Претсезонски семинар за судии, делегати и контролори пред сезоната 2026/2027

Судиската комисија и кошаркарската федерација на Македонија го организираат претсезонскиот семинар за судии, делегати и контролори, кој ќе се одржи од 25 до 27 септември 2026 година во хотел „Дрим“ и спортската сала „ТИМИ“.

Цел и програма

Семинарот претставува важна фаза од подготовките за домашната сезона 2026/2027, комбинирајќи теоретска и практична работа: физички и теоретски тестирања, видео-анализи и презентации на новините во правилата и судиската пракса.

Програмата започнува на 25 септември со пристигнување и регистрација, по што во вечерните часови ќе се одржи свечено отворање. Првиот ден ќе заврши со кратка работилница наменета за судиите кои првпат учествуваат на семинарот.

Во сабота, 26 септември, судиите ќе го започнат денот со физичкиот „Легер“ тест, додека контролорите и делегатите ќе направат осврт на работата и контролите од минатата сезона и ќе добијат насоки за претстојната сезона.

Централниот дел од програмата се состои од стручни предавања и работилници кои ќе опфатат: развојниот пат на судиите, дисруптивната и флагрантната грешка, промените поврзани со моментот на шутот, покривањето на играта, техничката грешка, контрола на играта и комуникација под притисок, како и новите судиски знаци, ознаки во записникот и промени во правилата за IRS. Меѓу предавачите се Мануел Мацони и Миодраг Личина од ФИБА Европа, како и Петар Денковски, национален инструктор при КФМ.

Семинарот ќе заврши на 27 септември со видео-работилница, анализа на работата на службените лица од минатата сезона и препораки за новата сезона, по што учесниците ќе полагаат теоретски тест. Претсезонскиот семинар е дел од подготовките на КФМ за успешна реализација на натпреварувањата во сезоната 2026/2027, со цел навремено запознавање на службените лица со новините, унапредување на нивната работа и обезбедување единствен пристап при примената на правилата на кошаркарската игра.

Фото: прес-материјал од настанот