Работите на подната фонтана на плоштад „Македонија“ тргнаа, па запреа — Градот: поправката бара повеќе време

Подната фонтана на плоштадот „Македонија“ во Скопје, која со години не функционираше, годинава беше ставена на ред за поправка, но по почетните активности работите се запрени и не е јасно кога повторно ќе профункционира. Градоначалникот Орце Ѓорѓиевски пред околу еден месец информираше дека се започнати градежните работи и дека наскоро фонтаната ќе биде ставена во функција.

По отстранувањето на плочките и откривањето на механиката, просторот долго време остана отворен и од далеку не личи дека се изведуваат активни градежни работи. Фотографијата од 30 јули 2026 покажува дека фонтаната е откриена, но неработна.

Од Град Скопје објаснуваат дека реконструкцијата ја спроведува ЈП „Водовод и канализација“ со засилена динамика, но дека зафатот е комплексен и бара повеќе време. Како причина ја наведуваат специјализираната опрема произведена во Германија и автоматизацијата која подразбира детална сервисирање и повторно усогласување.

Постоечката носечка потконструкција, која претходно беше направена од пластични носачи што поддржуваа бетонски плочи со тежина од околу 100 килограми по елемент, се заменува со нова конструкција од иноксни профили дизајнирани за значително поголеми механички оптоварувања. Со ваквата интервенција, велат од Градот, треба да се зголеми трајната стабилност и да се намали ризикот од оштетувања при влегување возила на површината.

Производство во работилница и очекуван календар

Новата иноксна конструкција веќе се изработува во специјализирана работилница, а Градот најавува дека нејзината монтажа на терен ќе започне во текот на наредните десетина дена, по што ќе следуваат преостанатите активности. "Наша цел не е фонтаната само привремено да се стави во функција, туку реконструкцијата да се изведе темелно, со квалитетно и долгорочно решение, кое ќе обезбеди сигурно и безбедно функционирање – истакнуваат од Градот."

Од општината потсетуваат дека другите фонтани во централното подрачје — „Воин на Коњ“, „Филип Втори“, „Прометеј“ и двете фонтани кај министерствата — се во функција, и дека остануваат посветени на постапно и квалитетно уредување на центарот на градот.

Фонтаната е изграденa во рамките на проектот „Скопје 2014“, беше пуштена во употреба во 2015 година и чинеше 2,5 милиони евра. Брзо стана летна атракција за децата, но во 2017 година во неа пропадна камион додека се поставуваше бина за прослава, а неколку години подоцна во неа пропадна и возило на „Комунална хигиена“ — по тие настани фонтаната престана да работи. Грижата за одржување ѝ беше доверена на ЈП „Водовод и канализација“, кое ги одржува 12-те фонтани во централното градско подрачје.

Од претпријатието со години најавуваа санација, а во периодот на ковид велат дека поправката ќе биде извршена по завршувањето на кризата и дека е направена процена на штетите. Сепак, во инвестициските планови за 2025 година немаше предвидени средства за реконструкција, а од Градот не дадоа прецизен датум кога работите ќе бидат финализирани.

Фото: прес-материјал од настанот