Ребаланс или пренамена: Владата пред ново прекројување на буџетот

Премиерот Мицкоски најави дека Владата размислува или за формален ребаланс на буџетот или за пренамена на веќе планираните средства, откако случувањата на меѓународната енергетска сцена ги зголемиле трошоците и го погодиле приливот на приходи.

Со околу три месеци до крајот на годината, останува да се соберат приближно две милијарди евра за да се остварат планираните приходи, додека од предвидениот дефицит до крајот на годината останува уште нешто над 100 милиони евра да бидат искористени.

Количината на празнината и опциите на власта

„За нас претставува предизвик бидејќи сето ова и сите мерки си имаат своја цена – како велат, бесплатен ручек нема. Така што, ќе мора да направиме најверојатно уште еден ребаланс на буџетот бидејќи само по основ на акциза проценките се дека отприлика ќе недостасуваат некаде околу пет милијарди денари. Ако на тоа се додаде и стапката на данокот на додадена вредност посебно за дизел горивото којашто е намалена доаѓаме до бројка од 7-8 милијарди денари којашта не може да биде покриена со прераспределба и ќе мора формално да се направи таков ребаланс“, изјави вчера премиерот Мицкоски.

Опозицијата, пак, со остри критики за економската политика и најавениот ребаланс. „Државата се задолжува. Сметката повторно доаѓа за наплата. Така изгледа економската политика на арамијата Мицкоски. Од шупливо во празно. Исто како дипломатијата. Ребалансот што го најави за овој месец е признание, не победа: буџетот веќе е пократок за 7 до 8 милијарди денари. Па дупката ќе ја крпи со нов план и со нов кредит. Поевтинувањето на бензинот е цената што граѓанинот ја плаќа двапати“, велат од СДСМ.

Ако не се донесе ребаланс следната недела, Владата ќе биде принудена да бара простор со пренамена на веќе планираните средства. Од владината прес-служба велат дека засега нема потврда дека прашањето ќе се најде на следната седница на Владата. Дали ќе има формално прекројување на буџетот или ќе се бара решение преку пренамена, треба да стане познато во наредните денови.

Фото: прес-материјал од настанот