Регионот кај Мариово во пламен — скопски пожарникари се приклучија во гаснењето

Конвој на Противпожарната бригада на Град Скопје попладнево се упати кон регионот на Мариово за да се приклучи во справувањето со големиот пожар што повторно се активира во прилепскиот дел на Мариово, соопшти градоначалникот Орце Ѓорѓиевски.

Помошта замина по барање на Дирекцијата за заштита и спасување

Според објавата на Градот, помошта е пратена по барање на директорот на Дирекцијата за заштита и спасување, Стојанче Ангелов. На терен веќе интервенираат прилепските пожарникари, екипи на Дирекцијата и доброволци од повеќе градови.

„Кога гори македонска земја, нема граници. Има само една обврска – да бидеме заедно, да си помогнеме и да го заштитимe секој човечки живот, секој дом и секоја педа од нашата татковина. Овие луѓе одат директно пред огнената стихија, со храброст и со една цел да спасат животи, домови, шуми и цели села“, напиша Ѓорѓиевски.

Посебно внимание е ставено на заштитата на селата во Мариово, откако огнот навлезе во делови од селото Чаниште; како критична точка е посочено и селото Крушевица. Екипите се фокусирани на евакуација и зачувување на имотот и инфраструктурата во најризичните места.

Гаснењето го отежнуваат непристапниот терен, високата сува трева и силниот ветер, кој предизвикува повторно разгорување и брзо ширење на огнот. Ангелов: Чаниште и трите манастири се безбедни, огнот се движи кон Крушевица.

Фотографии објавени од Град Скопје прикажуваат конвој на противпожарната бригада на пат кон Мариово; на терен се продолжува со координирани операции додека се следат временските услови кои може да влијаат на ширењето на пожарот.

Фото: Град Скопје