Реставрација на глацијалното езеро Рупа под врвот Р’жана

Националниот парк „Пелистер“ најави реставрација на глацијалното езеро Рупа, мало сезонско езеро сместено веднаш под врвот Р’жана (2.334 м н.в.), и обновување на Земјениот „Француски пат“ од Големо Езеро до Брајчино, Преспа, за да местото стане пристапно за посетители.

Базенот на езерото Рупа се наоѓа веднаш под северниот гребен на Р’жана — најјужниот врв во рамките на Националниот парк „Пелистер“, а неговиот северен гребен е познат и под името Гарван. Дијаметарот на базенот е околу шеесет метри, а длабочината достига околу два метра кога е наполнето, но езерото брзо пресушува и полно може да се види само во влажните периоди.

За формирањето и водостојот на езерото со години го следат планинарот Виктор Калаузи и професорот по географија Никола Димитров.

Денес Националниот парк „Пелистер“ објави снимки со дрон од базенот на езерото и од врвовите што го опкружуваат, и посочи дека местото може да прерасне во туристичка атракција откако ќе се спроведат реставрацијата и уредувањето на пристапот.

Историја и сегашна состојба

За време на Првата светска војна низ природниот бедем на езерото бил ископан канал и водата била испуштена за да се користи базенот за потребите на тогашните војски; поради тоа денес се забележува многу мала количина вода, и тоа само во текот на влажните периоди.

„Станува збор за еден од најтешко достапните терени на Пелистер за сите посетители, но и за ренџерската служба. Денес активностите на ренџерите во тој дел се ограничени поради недостапноста на теренот. Во соработка со Македонското еколошко друштво, во периодот што следи заеднички ќе работиме на реставрација на езерото Рупа“, најавија од Националниот парк „Пелистер“. Паркот планира да го обнови постојниот земјен Француски пат за полесно да се врши контрола, противпожарна заштита, мониторинг на биодиверзитетот и посета на туристи. Патот ќе остане земјен и ќе биде преминлив за теренски возила, велосипеди и пешаци, а сега е обраснат и движењето по него е отежнато.

Фото: Виктор Калаузи)