Родилки се жалат на доцнење на парите за породилно, ФЗОМ: нема застој

Родилките низ земјава во последните денови масовно пријавуваат на социјалните мрежи дека сè уште не ги добиле парите за породилно отсуство за месец јуни, иако веќе е средина на август. Во објавите тие опишуваат финансиски притисок и неизвесност додека чекаат средства за основни потреби.

На социјалните мрежи се споделуваат пораки и прашања од типот: „Дали доби денес некој патолошка или породилно?“, „Мајки, пишете ако добиете исплата денес“ и „Дали некој доби денес исплата на трудничко за јуни?“, а многумина велат дека од надлежните институции немаат добиено конкретен одговор кога парите ќе бидат префрлени на нивните сметки.

ФЗОМ: најголемиот дел од исплатите се завршени

На барањето за објаснување, Фондот за здравствено осигурување (ФЗОМ) категорично негира дека има застој во исплатите. Во официјалното соопштение испратено до медиумите се вели: "Кај најголемиот дел од корисниците, постапката за исплата на надоместокот за породилно отсуство за јуни е завршена. Постои незначителен број предмети кај кои исплатата сè уште не е реализирана, главно поради потреба од дополнување или корекција на податоците и документацијата, потребни за комплетирање на конкретниот предмет".

Во соопштението ФЗОМ појаснува дека не постои еден единствен фикс датум во месецот за исплата на надоместоците за породилно отсуство и отфрла дека користењето на годишните одмори на вработените го блокира процесот. Од таму додаваат дека постапката е континуирана и дека секој предмет се обработува според неговата комплетност, при што по приемот следат проверка, контрола и одобрување пред да се изврши исплатата.

Родилките, пак, бараат трајно и системско решение. Тие истакнуваат дека не бараат привилегии, туку почитување на законски загарантираното право, и предупредуваат дека борбата со негативниот демографски тренд нема да се реши со декларативни стратегии и маркетинг кампањи, туку со навремена финансиска поддршка на семејствата.

Фото: прилог МРТ