Русија ќе гради седум нови казнени установи со над 20.000 места

Русија планира до 2035 година да изгради седум нови казнени установи кои ќе комбинираат истражни затвори и затворски колонии со различни нивоа на безбедност, со вкупен капацитет што ќе надминува 20.000 места.

Според официјалните документи, од вкупниот капацитет, 5.380 места се предвидени за истражни затвори, а 15.120 за затворски колонии. Еден од комплексите е планиран на територија во Херсонската област во Украина, која е под руска окупација.

Локации и рокови

Во документите се наведуваат и други региони каде ќе се градат објектите: Калушка, Астраханска и Тјуменска област, како и Бурјатија и Забајкалскиот крај. Првата установа треба да биде отворена во Татарстан до 2030 година.

Според руското Министерство за правда, затворите од мешан тип треба да ги намалат трошоците за сместување на затвореници и осомничени за 25 до 30 проценти. Рускиот министер за правда, Константин Чујченко, најавил дека во новите комплекси ќе се применуваат современи организациски и инженерски решенија, вклучително и информатички технологии.

Шефот на руската Федерална служба за извршување на казните, Аркадиј Гостев, изјавил: "од 1984 година во Русија не е изградена ниту една нова затворска колонија."

Планот за изградба на нови капацитети доаѓа во период кога руските власти активно регрутираат затвореници за војната во Украина, вклучително и лица осудени за тешки кривични дела. Истовремено постојат бројни извештаи за условите во кои се држат украински воени заробеници, вклучително и обвинувања за тортура и недостиг на медицинска помош.

Фото: прес-материјал од настанот