Rusia njofton intensifikim të sulmeve ndaj Kievit dhe qyteteve të tjera ukrainase

Ministria e Mbrojtjes e Rusisë urdhëroi forcat e saj të sforcojnë sulmet ndaj Kievit dhe pjesëve të tjera të Ukrainës, duke e prezantuar këtë veprim si përgjigje ndaj shprehjeve të presidentit ukrainas, Volodymyr Zelensky, se Ukraina do të rrisë sulmet ndaj rafinerive ruse të naftës.

Sipas Ministrisë, forcat ruse duhet të intensifikojnë goditjet ndaj objekteve ushtarake, fabrikave të industrisë së mbrojtjes dhe infrastrukturës së lidhur në Kiev dhe në vende të tjera të Ukrainës. Kohët e fundit Rusia ka shtuar sulmet ndaj infrastrukturës ukrainase, përfshirë goditjet mbi urat mbi lumin Dnipro në kryeqytet.

Rritje e presionit para dimrit

Kjo fushatë më e ashpër ka prishur seriozisht jetën e rreth tre milion banorëve të kryeqytetit, teksa vjen periudha e dimrit, dhe ka synuar të demoralizojë civilët dhe të dëmtojë shërbimet themelore.

Në një intervistë të publikuar dje, Zelensky tha se Ukraina do të rrisë më tej sulmet ndaj rafinerive ruse si përgjigje ndaj taktikave të reja të sulmeve ajrore të Moskës, të cilat synojnë të detyrojnë njerëzit të largohen nga Kiev dhe qytetet e tjera, por "nuk do të godasë civilët. Në atë drejtim do t'u ndihmojnë projektet e reja balistike."

Ministria ruse e Mbrojtjes thotë se sulmet e saj të fundit ndaj Kievit dhe rajoneve të tjera janë masa hakmarrëse ndaj sulmeve që i atribuohen Kievit kundër objekteve civile brenda Rusisë.

Foto: material shtypi nga ngjarja