САД и Русија разговараат за обновување на испораките на руски гас во Европа

Високи руски и американски функционери разговарале за можно вклучување на американски инвеститори во гасоводите „Северен тек“, кои дојавауваа гас во Германија пред Русија да ја нападне Украина, велат пет лица запознати со ситуацијата.

Во разговорите учествувале советникот на Кремљ Кирил Дмитриев и Џаред Кушнер, зетот на поранешниот претседател Доналд Трамп. Кушнер, според соговорниците, смета дека водењето бизнис може да помогне за враќање на мирот и дека евентуален договор би им овозможил на американските инвеститори да профитираат од енергетските токови кон Европа откако ќе заврши војната.

Дмитриев и Кушнер се сретнале во Москва и во Њујорк во последните недели, изјавија изворите. Дополнително, Дмитриев минатиот месец имал средби со претставници на американските министерства за енергетика и за финансии за да разговараат за потенцијални енергетски инициативи меѓу САД и Русија.

„Секој договор со Русија ќе мора да биде договорен со американската Меѓународна финансиска корпорација за развој и министерството за финансии и мора да биде од корист за американските даночни обврзници и компании“, рече функционер од Белата куќа, кога беше прашан за дискусиите за гасоводот.

Американски функционери предупредуваат дека, поради пречките, договор е малку веројатен во скоро време. Гасоводите „Северен тек“ се санкционирани од САД и од ЕУ, што го прави нивното повторно отворање правно спорно. Поддржувачите на рестартирање би се надеваале на можното укинување или ублажување на санкциите од страна на администрацијата на Трамп, но доколку демократите ја преземат контролата врз Конгресот по меѓуизборите следниот месец тоа би го отежнело овој потег.

Германија и други европски земји силно се спротивставуваат на повторно отворање на „Северен тек“. Портпаролка на германското Министерство за економија и енергетика изјави дека „Северен тек“ и рускиот гас се санкционирани во Европа и дека Германија пронашла алтернативи.

Фото: Кремљ)