Савески: Судските рокови за притвор мора да се почитуваат; Врховниот суд ги проверува одлуките, не обвиненијата

Републичкиот јавен обвинител Ненад Савески денеска ги отфрли забелешките дека судовите постапуваат под притисок или во служба на јавното обвинителство, коментирајќи ги реакцииите по пресудите во предметите „Ласкарци“ и случајот со поранешниот градоначалник од Карпош, Стевчо Јакимовски. Тој нагласи дека Врховниот суд ги проверува законитоста на одлуките на пониските судови, а не обвинителните акти, и посочи дека роковите за притвор во случајот „Пулс“ мора да се почитуваат.

Врховниот суд проверува одлуки, не обвиненија

По денешната седница на Советот на јавни обвинители, Савески одговори на прашања на новинарите и ги отфрли оценките на дел од поранешните судии и адвокати дека првостепените судови носат пресуди без доволно да ги ценат доказите, кои потоа се укинуваат од повисоките инстанци.

„Не можам да прифатам, а апсолутно сметам дека е погрешен впечатокот дека судовите ги носат одлуките под притисок, под влијание или во служба на јавното обвинителство. Пресудите се носат во името на граѓаните на Република Северна Македонија, врз основа на примена на законите и доказите што се содржани во тие предмети,“ изјави Савески по денешната седница на Советот на јавни обвинители.

Во врска со прашањето дали проблемите во предметите „Ласкарци“ и Стевчо Јакимовски се врзани со обвиненијата, Савески нагласи дека Врховниот суд не ги ценел обвинителните акти, туку одлуките донесени од пониските судови.

„Одлуките на повисоките судови се во врска со одлуките на пониските судови. Врховниот суд не ги ценел обвиненијата, туку одлуките на второстепениот и првостепениот суд,“ рече Савески.

Во однос на предметот „Пулс“ и можноста сопственикот Дејан Јованов – Деко да излезе од притвор поради истекување на законските рокови, Савески потсети дека траењето на притворот е регулирано со закон и дека максималните рокови мора да се почитуваат.

„Траењето на притворот е регулирано со закон и со максимални рокови. Во овој случај е извесно дека тие рокови наскоро ќе се исцрпат,“ рече тој, додавајќи дека обвинителството секогаш има на располагање и други законски можности за обезбедување присуство на осомничениот.

Савески не сакаше да прејудицира дали обвинителите во случајот „Пулс“ ќе побараат алтернативни мерки, нагласувајќи дека тоа е надлежност на јавните обвинители кои постапуваат по предметот.

Тој додаде дека рокот за поднесување жалба против одлуката на дисциплинската комисија во предметот поврзан со обвинителот Јован Цветановски веќе истекол и дека нема да поднесува жалба. Што се однесува до забелешките дека на прославата по повод Денот на независноста имал „почесно“ место до премиерот, Савески рече дека седел на место предвидено со протоколот на Владата и не се чувствувал привилегиран во однос на другите гости.

Фото: прес-материјал од настанот