СДСМ поднесе предлог-закон за финансиска поддршка на земјоделците

Пратничката група на СДСМ и коалицијата во Собранието поднесе предлог-закон со којшто се предлагаат таргетирани финансиски мерки за ублажување на ефектите од економската криза во 2026 година врз производство и откупот на земјоделските производи.

На прес-конференција во Собрание лидерот на СДСМ Венко Филипче ги опиша средбите со земјоделците и посочи на растечките загуби. "Изминатиот период се сретнавме со стотици земјоделци, луѓе кои макотрпно работат од сабајле до вечер и ги слушнавме нивните проблеми. Бевме таму на терен кај нив, кај лозарите, кај сточарите, млекопроизводителите, оризопроизводителите, производителите на пиперка... Сите се соочуваат со истиот проблем. Прво се разочарани затоа што никој од власта не им обрнува никакво внимание. Понатаму, се многу загрижени и исплашени, затоа што и покрај тоа што работат од сабајле до вечер, ги вложиле последните пари од семејните буџети, некои од нив дури земале и кредити за да купат репроматеријали, да може оваа година, овие сезони да има род тоа што тие го работат, и сега нема никаков откуп. ​Родот скапува на нивите. Онаа мала количина на производот којшто тие го произведуваат којшто е откупен, е со мизерно ниски цени - рече лидерот на СДСМ Венко Филипче на прес-конференција во Собрание."

Што предлага законот

Во предложениот закон се набројуваат конкретни износи за најпогодените категории производители: финансиска поддршка од 8 денари за секој килограм произведено и продадено грозје од сортите Вранец и Кратошија; за лозарите кои нема да успеат да го продадат своето грозје, поддршка од 300.000 денари по хектар евидентиран лозов насад. За производителите на пиперка (ајварка) предвидени се 10 денари по килограм продадена пиперка и дополнителни 200.000 денари по хектар евидентирана засадена површина. За пченица е предвидена поддршка од 5 денари по килограм, без разлика дали е продадена кај регистриран откупувач или е складирана во евидентиран склад. За сточарите се предвидени 8.000 денари по грло, за оние што се влезени во програмата за 2025 година и што се евидентирани и за 2026 година. Оризопроизводителите се опфатени со 10 денари по килограм произведена и продадена оризова арпа кај регистриран откупувач во 2026 година.

Корисници ќе бидат земјоделските стопанства регистрирани во Единствениот регистар на земјоделски стопанства. Предвидената помош е дополнителна на редовните директни плаќања и на другите мерки за 2026 година, а Платежната агенција треба да ги исплати средствата најдоцна до 31 декември 2026 година. Според предлогот, овие средства ќе им служат на земјоделците за планирање на следната сезона и подготовка за 2027 година.

"Ова е тоа што е сега потребно: нераспродавање на македонската земја и вода за туѓи интереси и за туѓи профити. Македонската земја треба да ја обработуваат македонските земјоделци, водата треба да се користи прво за пристоен живот, понатаму да се наводнува земјиштето" - посочи Филипче, нагласувајќи ја и ставот за земјата и водните ресурси.

Филипче апелираше до пратениците од владејачките партии да го поддржат предлог-законот, истакнувајќи дека мерките доаѓаат во "исклучително критичен момент" и дека гласањето не треба да биде партиско прашање, туку прашање на опстанок за илјадници семејства кои живеат од земјоделството.

Фото: прес-материјал од настанот