СДСМ предлага ДДВ за горивата 5%, акцизите да се намалат за 50%

Опозицискиот СДСМ предложи пакет мерки за намалување на трошоците за нафтените деривати: ДДВ за горивата да се намали од 18 на 5 проценти и да се скратат акцизите за 50 отсто, соопшти партијата откако цените повторно пораснаа.

СДСМ: Мерките ќе го намалат притисокот врз цените и семејните буџети

Според социјалдемократите, двете промени ќе имаат директен ефект и ќе ги намалат цените не само на бензинските пумпи туку и во потрошувачката кошничка и во вкупното ниво на цени, што би помогнало на домаќинствата погодени од растот на трошоците.

Наташа Поповиќ – членка на Извршниот одбор на СДСМ, предупреди на остар удар по животниот стандард: "Цените на горивата се до плафон, а од вчера дизелот е над 100 денари за литар. Само за шест месеци цената на дизелот порасна за 43 отсто. Ова е нов удар врз стандардот на граѓаните, но Владата на Мицкоски не презема ништо. Нема намалување на ДДВ. Нема намалување на акцизата. Нема мерки за заштита на стандардот", рече на денешната прес-конференција Наташа Поповиќ – членка на Извршниот одбор на СДСМ.

Реакцијата на опозицијата следува откако вчера премиерот Христијан Мицкоски на темата за покачувањето на цените на нафтените деривати изјави дека Владата има јасен план и стратегија, но не прецизираше кога и какви конкретни мерки ќе бидат преземени.

Од СДСМ предупредуваат дека ударот по џебот не застанува на пумпите: поскапениот транспорт ги зголемува трошоците за производство, земјоделците се соочуваат со повисоки расходи, а тоа може да доведе и до нов раст на цените на храната.

"Половина од семејниот буџет на македонските граѓани веќе оди за храна и пијалаци, потрошувачката кошничка е речиси 70 000 денари, а платите стагнираат. Секој нов денар на лебот, млекото, зеленчукот и овошјето директно удира врз семејната трпеза. Животниот стандард на граѓаните се намалува, а Владата не презема ништо", коментираат од СДСМ.

Според последната одлука на РКЕ, литар еуросупер БС-95 се продава за 93 денари, еуросупер БС-98 чини 95 денари за литар, а литар дизел се продава за 101,5 денари.

СДСМ побара веднаш да се применат намалувањата на ДДВ и на акцизите, порачувајќи дека итни и конкретни чекори се неопходни за ублажување на инфлаторниот притисок врз домаќинствата и економијата.

Фото: прес-материјал од настанот