Се гради потпорен ѕид во градинката „Панорама“ за да се спречи ерозија на земјиштето

Во објектот „Панорама“, клон на градинката „Кочо Рацин“ во Општина Центар, се изведува нов армирано‑бетонски потпорен ѕид со цел стабилизација на теренот и спречување на ерозивни процеси.

Технички решенија

Новиот потпорен ѕид е проектиран според постојната конфигурација на теренот и е поделeн на шест одделни кампади. Вкупната висина заедно со темелната конструкција изнесува 3,20 метри. Целата конструкција се изведува од армиран бетон, согласно техничките прописи и стандарди.

Зад ѕидот ќе биде поставен дренажен слој од дробен камен обвиткан со геотекстил, со цел заштита од ерозија и соодветно одведување на водата. На нивото на темелот се поставува и ПВЦ дренажна цевка со дијаметар од 300 милиметри, преку која ќе се одведуваат подземните и инфилтрираните води зад ѕидот, појаснуваат од Општина Центар.

Градоначалникот на Општина Центар, Горан Герасимовски, вели дека се работи за сериозен и неопходен градежен зафат и дека уште пред почетокот на работите се преземени мерки за безбедност на децата.

"Ова е голем и важен зафат со кој трајно го стабилизираме теренот и создаваме побезбедни услови во градинката. Уште пред да започнат градежните работи, сите деца од објектот „Панорама“ ги префрливме во објектот „Бели Мугри“, каде што непречено продолжија со престојот. Безбедноста на децата за нас секогаш е на прво место и затоа не правиме компромиси кога станува збор за вакви инфраструктурни зафати, изјави Герасимовски.

Општинските службеници велат дека проектот треба да обезбеди долгорочно решавање на ризикот од ерозија на локацијата, а привремената префрлање на деца е организирана за да се овозможи непречено работење на воспитно‑образовните активности додека траат градежните работи.

Фото: Општина Центар