Сергеј Попоски ја претстави „Jednom zauvijek“ во Рагуза 360 — прва авторска песна пред домашна публика

Младиот пејач Сергеј Попоски официјално ја претстави својата прва авторска песна и видеоспот „Jednom zauvijek“ пред домашната публика во „Рагуза 360“ во Скопје. На настанот, кој се одржа како прес-конференција и коктел-забава, тој ја изведе и раскажа приказната зад новиот музички проект.

Од Прилеп до големите сцени

Патот на Попоски кон сцената започнува уште во детството во Прилеп, каде го запозна музичкиот свет преку својот дедо — музичар, пијанист, виолинист и диригент. На 15-годишна возраст ја продолжува наобразбата во музичкото училиште „Матрикс“ под водство на вокалниот ментор Денис Димоски, а подоцна настапува на фестивали како „Охрид Фест“, „Макфест“ и „Студентско лето“.

Во 2026 година тој го освои Grand Prix на WAF Awards во Скопје, а неодамна неговите видеа на TikTok привлечоа стотици илјади прегледи. На 19 септември настапи и пред полните љубљански Крижанке, каде публиката побара бис.

За враќањето и премиерата пред домашната публика Попоски рече: "За мене оваа вечер има навистина посебно значење. Македонија е местото каде што започна мојата љубов кон музиката, каде што ги направив првите чекори и каде што се луѓето кои ме познаваат од самиот почеток. Многу сум горд што по сè што ми се случува во последниот период, вечерва сум тука и можам мојата прва песна да ја споделам со домашната публика. ‘Jednom zauvijek’ е само почеток и се надевам дека ова е прва од многу песни и средби што ќе ги споделуваме во иднина."

„Jednom zauvijek“ е првиот авторски запис на Попоски: музиката е дело на Maria Dzheneva-Kiskinova, текстот е напишан од Tomislav Jovanović, а аранжманот е на Miro Buljan. Видеоспотот е реализиран од регионална креативна екипа — режија Dejan Miličević, директор на фотографија Vladimir Borović, зад камерата Ognjen Predić, монтажа Vladimir Borović, а за шминка, костими и сценографија се погрижи Srđan Nikolić.

Иако денес живее и создава во Словенија, Попоски не ги заборава македонските корени и планира да ги вгради во својот современ израз, со цел да гради кариера што ќе го поврзе регионот. Видеото е достапно на YouTube, а на социјалните мрежи го следите под @sergejpoposki.

Фото: прес-материјал од настанот