Силен ветер ги разгорува пожарите во Грција; најтешко во Агиа Параскеви на Крит

Силен ветер ги разгорува шумските пожари низ повеќе делови на Грција, при што пожарникарите и воздушните екипи се борат со нови жаришта кои ги отежнуваат напорите за локализирање на огнот.

Најкритична е состојбата во областа Агиа Параскеви во Ретимно на островот Крит, каде екипите дење и ноќе се справуваа со пожарот, а со првите утрински часови повторно беа вклучени и противпожарни авиони.

Нови жаришта и итни предупредувања

Нови пожари избувнаа и во Ахаја на северозападниот дел од Пелопонез, како и во регионот Ксиромеро во Етолија-Акарнанија, што дополнително ги оптовари напорите на службите на терен.

Властите испратија итни предупредувања преку системот „112“, и на терен се распоредени бројни пожарникари и воздушни сили. Грчката служба за цивилна заштита предупреди дека делови од земјата, вклучително и регионот Атика и поширокото подрачје околу Атина, денес се под многу висок ризик од пожари — четврто ниво на опасност.

Меѓувреме, состојбата се подобри на островите Андрос и Калимнос, додека на Парос пожарникарите и понатаму се борат со повеќе мали жаришта кои повторно се активираат поради силниот ветер. Властите ги повикаа граѓаните да избегнуваат активности што може да предизвикаат пожар и строго да ги почитуваат упатствата на надлежните служби.

Фото: прес-материјал од настанот