Симон Трпчески омајува на Куфониси: музика под ѕвездите во срцето на Кикладите

Симон Трпчески приреди концерт на отворено на островот Куфониси, каде на фестивалот Koufonisia Classical ја понуди својата препознатлива виртуозност пред публика сместена сред карактеристичниот пејзаж на Кикладите.

Трпчески објави неколку фотографии и ја опиша атмосферата со зборовите: „Имав единствено искуство на фестивалот за класична музика Куфониси (Koufonisia Classical) сред Кикладиските Острови! Му благодарам на Корнилиус Михаилидис и на целата екипа во организацијата за сјајниот поминат пат и престој на овој магичен остров, каде луѓето искрено ја сакаат музиката. На друго море, Романија пристигнуваме!“

Од скромни почетоци до светски бини

Во текот на кариерата, Трпчески стекна големо меѓународно реноме — медиумите го опишуваа како „абнормално нормален пијанист", а во неговата биографија стојат настапи пред светски лидери и кралски личности, меѓу кои и средбата со тогашниот принц Чарлс. Сепак тој редовно се враќа на сопственото потекло.

Пијанистот пораснал во семејство од пет членови, во стан од едвај 56 квадратни метри. Патот до најпрестижните концертни сали, по неговите зборови, бил формиран со многу труд, дисциплина и одрекувања, а успехот го смета за успех на целото семејство.

Како важен столб на неговиот приватен живот се јавува сопругата Даниела Трпческа — психолог по професија. По десет години врска, тие стапија во брак во 2008 година и имаат три деца: ќерката Лара и близнаците Андреј и Стефан. Лара веќе ја претставуваше Македонија на Детскиот Евросонг, а Даниела, иако ретко се појавува во медиумите, е редовно покрај него на сите турнеи.

Фото: прес-материјал од настанот