Siri dhe Izraeli mbajtën bisedime të ndërmjetësuara nga SHBA në Jordan për të ulur tensionet
Bisedimet në Jordan, të ndërmjetësuara nga SHBA, synuan të ndalonin sulmet izraelite dhe të rinisnin negociatat për një marrëveshje sigurie.
Siri dhe Izraeli zhvilluan bisedime të ndërmjetësuara nga Shtetet e Bashkuara mbrëmë në Jordan në përpjekje për të ulur tensionet pas sulmeve izraelite në territorin sirian.
Bisedimet, të koordinuara me Uashingtonin, synonin të krijonin mekanizma praktikë për të ndalur sulmet izraelite, arrestimet dhe operacionet e synuara, si dhe të rinisnin negociatat për një marrëveshje sigurie që mund të shërbente si bazë për një marrëveshje më të gjerë në të ardhmen.
Pikat kyçe dhe kufij të qartë
Ministri sirian i Jashtëm, Asad al Shaybani, deklaroi se Damasku pritet që bisedimet e sigurisë me Izraelin të rifillojnë së shpejti, megjithëse mungesa e besimit mbetet. Ai tha se palët në fillim të vitit kishin arritur në letër marrëveshje për "gati gjithçka", përfshirë propozimet për zona sigurie në jug të Sirisë dhe një zonë tampon ku do të ishin të pranishme vetëm forcat e Kombeve të Bashkuara, por Damasku dyshon në gatishmërinë e Izraelit për t'i zbatuar angazhimet.
Në takim përfaqësuesit sirianë theksuan se prioritetet e menjëhershme mbeten tërheqja izraelite në pozicionet para rënies së Bashar al-Assad më 8 dhjetor 2024 dhe rikthimi i plotë i Marrëveshjes së Ndarae të Forcave të vitit 1974. Damasku gjithashtu i tha ekipit negociator izraelit se nuk do të pranojë rregullime që do ta kufizonin të drejtën e tij për të rindërtuar dhe zhvilluar forcat e armatosura ose për të përcaktuar vetë aleancat dhe partneritetet e tij.
Delegacionet diskutuan gjithashtu për uljen e tensioneve midis Izraelit dhe Turqisë dhe parandaluar që rivaliteti i tyre të përhapej në territorin sirian. Mediat siriane po ashtu vunë në dukje se sulmet izraelite të javës së kaluar mbi bazën ajrore Abu al-Duhur çuan në pezullimin e kontakteve.
Siria dhe Izraeli janë formalish në gjendje lufte që nga viti 1948. Izraeli pushtoi Lartësitë e Golanit nga Siria gjatë Luftës së Gjashtëditore të vitit 1967 dhe më pas i aneksoi; aneksimi u njoh nga Shtetet e Bashkuara, por jo nga shumica e komunitetit ndërkombëtar.
Foto: EPA/ATEF SAFADI
