Sulmet ndaj rafinerive në Rusi shkaktojnë krizë të re të karburantit që kërcënon logjistikën

Sulmet e forcave ukrainase ndaj rafinerive të naftës kanë shkaktuar një krizë të re të karburantit në Rusi, duke prekur të paktën 30 rajone dhe duke goditur në mënyrë të veçantë Moskën dhe rajonin e Moskës — një valë e ndryshme nga mungesa e mëparshme që zgjati nga fundi i majit deri në mes të korrikut. Rrjetet e karburantit të lidhura me Gazprom Neft dhe Tatneft tashmë kanë kufizuar shitjen në Moskë.

Janë raportuar radhë të gjata në pikat e karburantit në jug, përfshirë Krasnodar dhe qytetin bregdetar të Soçit. "Me atmosferën e saj të qetë dhe ritmin më të ngadaltë të jetës, Soçi i sotëm ngjan me kohën para Lojërave Olimpike, kur kishte pak makina në rrugë dhe qyteti kishte shumë më pak turistë dhe banorë. Por, çështja është kjo: në Soçi nuk ka benzinë", shkroi Igor Zakharchenko, agjent imobiliar nga qyteti bregdetar.

Mungesa po ndikon tashmë në shërbimet e përditshme. "Nuk mund të thuhet që nuk ka fare karburant, por ndjehet kriza. Nuk është vetëm një problem personal, pasiguria nëse dikush mund të largohet nga qyteti dhe të kthehet, por edhe një problem ekonomik", tha Oleg Grigorenko, kryeredaktor i portalit të pavarur online 7x, i etiketuar si "agjent i huaj" në Rusi. Ai shtoi se taksistët, shërbimet e kurrierëve dhe sektori i ndërtimit në disa rajone raportojnë ulje të porosive, sepse shumë zinxhirë furnizimi varen nga karburanti.

Cilësia, logjistika dhe reagimet zyrtare

Paralelisht me mungesën, janë shfaqur shqetësime për cilësinë e karburantit. "Makina nuk ndizet dhe duhet të dërgohet për servis. Nga të njëjtat persona, di që ka lista pritjeje për riparime që zgjasin muaj, madje edhe në Moskë. Pastaj edhe për pjesët rezervë pritet me muaj. Sipas dukurisë, disa automjete nuk mund të përballojnë karburantin që po derdhet në rezervuarët e tyre. Sigurisht, lufta vazhdon dhe nuk dihet me saktësi çfarë prodhohet dhe në çfarë përqindjesh përzierjet hynë në karburant", tha Nikolay Korshenevski, ekspert ekonomik që tani jeton jashtë Rusisë.

Zyrtarët kanë dhënë vlerësime të ndryshme: Igor Ananskikh, zv/kryetar i Komitetit për Energjitikë në Duma, tha se furnizimi mund të kthehet në normalitet brenda dy deri tre javësh. Analistë të tjerë janë skeptikë dhe vënë në dukje se rafineritë e dëmtuara është e vështirë të rindërtohen shpejt dhe mbeten të prekshme nga sulmet e reja. Si rezultat, autoritetet kanë nisur të kufizojnë konsumimin dhe u japin akses prioritar institucioneve shëndetësore, policisë, zjarrfikësve, automjeteve komunale dhe njësive që lidhen me forcat e sigurisë dhe agjencitë qeveritare. "Kjo ndodh para syve të njerëzve që presin për orë, gjë që shkakton zemërim të madh", theksoi një kritik i Kremlinit.

Analistët paralajmërojnë se importet nga India ose Kina nuk mund të mbulojnë boshllëkun. "Duke marrë parasysh izolimin me të cilin ballafaqohet Rusia, është e pamundur të sigurohet furnizim prej 200,000 ton karburant në ditë, që është përafërsisht sasia e benzinës dhe naftës që Rusia ka nevojë çdo ditë", tha Vyacheslav Shiryaev, analist ekonomik në mërgim. Ai shtoi se nëse Ukraina rrit intensitetin e sulmeve ndaj infrastrukturës brenda territorit rus, kjo mund të trondisë seriozisht ekonominë dhe të përshpejtojë përfundimin e luftës.

"Nëse përfundon nafta dizel, rrjeti hekurudhor rus prej 6,000 kilometrash do të ndalet. Kjo mund të paralizojë qindra impiante industriale. Pa dizel, dhjetëra mijëra kamionë nuk do të mund të qarkullojnë, ushqimi nuk do të arrijë në dyqane dhe bujqit nuk do të mund të kryejnë korrjet", paralajmëroi Shiryaev. "Nëse Ukraina shkatërron gjithë infrastrukturën e përpunimit të naftës, Putin do të konstatojë se urdhrat e tij nuk zbatohen më", shtoi ai. Në anën tjetër, një këshilltar i Kremlinit ka paralajmëruar se "burime të panjohura" mund të shënjestrojnë fabrika dronash britanike — një koment që reflekton retorikën e përshkallëzuar lidhur me konfliktin.

Foto: Printskrin / Telegram