Спасен Сиљаноски: од таксист и војник до водител и фолк-ѕвезда

Популарниот фолк-изведувач Спасен Сиљаноски јавно го раскажа својот пат до сцена и телевизија, откривајќи дека пред да стане препознатливо име, животот го натерал да работи различни, понекогаш тешки занимања за да ја прехрани семејството.

Тешка животна приказна

„Во животот сум работел сè и сешто. Од ништо не се срамам сè додека работам чесно“, изјави Сиљаноски, посочувајќи дека трудот и искрената работа му останале водилка.

Малкумина знаат дека пред музичката слава тој работел како таксист, бил во македонската армија и вршел обезбедување во ноќни клубови. Денес, покрај музичката кариера и новата водителска улога во емисијата „Везилка“, често се врнува во родното село Пополжани каде помага во нивата.

Спасен во интервјуто откри и еден од најтешките моменти од младоста: истиот ден кога требало да се запише на факултет, неговиот татко останал без работа. „Пораснат сум во една средина каде што буквално сме се бореле за да се прехраниме. Имало тешки моменти каде што, во моментите кога завршив гимназија, требаше да се запишам на факултет, истиот ден татко ми го бркаат од работа. Доаѓаме дома, немаме за леб. Ми викаат оди ти, ние ќе се снаоѓаме, ќе работиме земјоделие, ќе береме шумски плодови, печурки или не знам што“, рече Сиљаноски, опишувајќи како семејството се снаоѓало.

Неговата животна приказна, позната по патриотски песни и интензивни настапи, ја надополнува сликата за човек кој подоцна ја стекна популарноста но ја носи со скромност и работна етика.

Фото: прес-материјал од настанот