Специјализираниот совет во Хаг ги осуди поранешните водачи на ОВК — Тачи и Красниќи по 25 години, Весели 18, Селими 13

Специјализираниот совет во Хаг изрече повеќегодишни затворски казни за четворица поранешни водачи на Ослободителната војска на Косово (ОВК). Хашим Тачи и Јакуп Красниќи добија по 25 години затвор, Кадри Весели е осуден на 18 години, а Реџеп Селими на 13 години затвор.

Клучни наоди на судот

Советот утврдил дека обвинетите не ги сториле злосторствата против човештвото, но дека се индивидуално одговорни за воени злосторства поврзани со незаконско апсење на најмалку 385 лица. Наодите опфаќаат периодот од април 1998 до јуни 1999 година и оперирање во 12 општини во Косово и во еден округ во Албанија.

Според пресудата, активностите поврзани со нелегалните притворања довеле и до убиство на 96 лица кои не учествувале активно во конфликтот. Советот заклучил дека обвинетите дејствувале заеднички, со постигнат договор за заедничка криминална цел: основање притворски установи, распределба на улоги и обезбедување целосна неказнивост за сторителите.

Пресудата ја опишува и индивидуалната одговорност: Хашим Тачи, се вели, имал клучна улога — именувал лојални лица на командни позиции, ја одржувал контролата врз ОВК и обезбедувал спроведување на планот. Јакуп Красниќи, пак, дал значителен придонес и поттикнувал извршување на кривични дела против лица сметани за противници, но не презел мерки да спречи или казни незаконски апсења, злоупотреби и убиства.

Кадри Весели е оценет дека учествувал и поттикнувал извршување на кривични дела и дејствувал заедно со останатите кои ја постигнале заедничката криминална цел. Реџеп Селими, како член на Генералштабот на ОВК, бил клучен во воспоставувањето на оперативни зони кои ги посетувал редовно.

Пресудите се во првостепена постапка и обвинетите имаат право на жалба.

Фото: EPA/ARBEN LLAPASHTICA