Стојанче Ангелов затекна огниште за скара покрај Треска: „Ова е рецепт за катастрофа“

Директорот на Центарот за управување со кризи (ЦУК), Стојанче Ангелов, при обиколка на терен во Општина Македонски Брод затекна неправилно поставено огниште за скара покрај реката Треска. Од институцијата велат дека огништето, најверојатно, го користеле риболовци.

Предупредување до граѓаните

Ангелов ги повика граѓаните да бидат внимателни со огнот откако го најде огништето. „Во услови кога секој ден се соочуваме со пожари на отворен простор, ваквото неодговорно однесување може да има сериозни последици“, порача тој, нагласувајќи дека околу огништето има сува трева и суви гранки кои водат до блиската шума, што е „рецепт за катастрофа“.

Од ЦУК информираа дека до 13 часот денеска биле регистрирани вкупно 10 пожари на отворен простор, од кои пет биле активни, два биле ставени под контрола, а три биле целосно изгаснати.

Меѓу активните пожари е и оној во Општина Македонски Брод, каде што огнот зафатил ниска вегетација, нискостеблеста шума и грмушки во месноста Видуш, кај селото Драгов Дол и кај Локвица.

Активни пожари има и во Општина Студеничани, каде што се зафатени мешани шуми кај селата Моране, Вртекица и Рамни Габер, како и во Општините Велес и Зелениково, каде што пожарот од месноста Горно Село кај селото С’лп се проширил кон Карабуњиште, Добрино и Тисовица.

Активен пожар има и на подрачјето на Општините Јегуновце, Желино и Сарај, каде што се зафатени мешани шуми кај Копанце, Туденце и Церово, со проширување кон Бојане. Во Општина Штип активен е пожарот во населбата Балканска, каде што гори ниска вегетација.

Под контрола се ставени пожарите во селото Железница во Општина Кратово и на депонијата во Делчево. Четири пожари сѐ уште беснеат низ земјата — огнот се шири кон неколку села.

Фото: Принтскрин / Јутуб/ДЗС