Стојаноска: Влен беше тројански коњ за ДУИ во Брвеница

Пратеничката и членка на Извршниот комитет на ВМРО‑ДПМНЕ, Дафина Стојаноска, вечерва обвини дека Влен во вториот круг од локалните избори во Општина Брвеница фактички отворил пат за Демократската унија за интеграција (ДУИ).

Стојаноска: Влен се приклучи на кандидатот на НАИ

Според Стојаноска, ВМРО‑ДПМНЕ и коалицијата „Твоја Македонија“ во првиот круг го поддржале својот кандидат Стојанчо Радичевски, додека Влен настапил со свој кандидат, за во вториот круг да застане зад кандидатот на Националната алијанса за интеграција (НАИ).

Во гостувањето во централниот дневник на Сител телевизија, Стојаноска рече дека Влен ја пропуштил шансата да се дистанцира од ДУИ и дека со својата одлука го раштркал гласачкиот блок. „Видете, јас не верувам дека Влен е некој голем фактор во Општина Брвеница, впрочем, тоа го покажаа и резултатите од првиот круг на изборите тука. Инаку, јасно, ние на овие избори работевме одделно, односно, нашата партија заедно со коалицијата ‘Твоја Македонија’ застана зад нашиот кандидат Стојанчо Радичевски, додека Влен во првиот круг работеше за нивниот кандидат, а во вториот круг одлучи да се приклучи на кандидатот на НАИ“,

Таа го критикуваше Влен поврзувајќи го со другите партии кои, според неа, непланирано му помогнале на ДУИ. „Жалиме што ете Влен не ја искористи оваа прилика да покаже дека се поразлични од ДУИ туку, исто како и СДС и Левица. Мислам дека ја одиграа улогата на тројански коњ и одиграа за ДУИ, односно ги раштрка гласовите од гласачкиот базен“, рече таа.

Во контекст на пошироката политичка слика, Стојаноска оцени дека локалните избори во Брвеница не се тест за владината коалиција, туку потврда на реализацијата на владината програма која, според неа, тече по план. Таа додаде дека СДСМ по локалните избори станала маргинална партија и ја обвини партиската управа предводена од Венко Филипче за тоа: „Така, СДС стана, би рекла, маргинална партија после овие локални избори, особено заради катастрофалното нејзино раководење од страна на Венко Филипче. И јас сметам дека венковистите можеби сега и би се радувале или навиваат да победи нивниот партнер ДУИ, што впрочем докажува дека секогаш кога ќе ги споменеме ДУИ и СДС, треба да сме свесни дека станува збор за две различни страни од една иста паричка“,

Фото: прес-материјал од настанот