Судењето за пожарот во „Пулс“ продолжи со искази на поранешен началник и очевидци

Со сведочења на сведоци предложени од одбраната продолжи судењето против 13 полициски службеници обвинети дека не постапиле согласно предвидениот акциски план во врска со дискотеката „Пулс“ во Кочани. Пред судот исказ дадоа поранешен началник на ОВР Пробиштип, Горан Моневски, и лица кои биле присутни во објектот ноќта кога избувна пожарот.

Моневски рече дека бил известен оти за викендот 15 и 16 март треба да бидат ангажирани полициски службеници на подрачјето на ОВР Кочани врз основа на претходно утврден план. Според неговиот исказ, на 14-ти бил известен дека е одобрена контрола на угостителски објекти и дека ќе биде контактиран за профилот на потребниот кадар.

Повикот, алармот и првите информации

За моментот кога бил информиран за пожарот сведокот раскажа дека околу три часот му се јавил колегата Дарко Милошевски и со видно вознемирен тон кажал: "Началник, ние сме во кабаре Пулс, се запали дискотеката, колегата Тоше го нема". Моневски додаде дека го побарал повторно и тогаш слушнал: "Началник, можеби има сто жртви, а колегата Тоше не се јавува на телефон", по што било побарано брзо да интервенираат и да повикаат брза помош и противпожарни служби.

Тој посочи дека по известувањето на надлежните служби веднаш се упатил кон „Пулс“, каде ги затекнал полициските службеници од ОВР Пробиштип видливо исчадени и исцрпени. Подоцна, како што кажа, добил информација дека колегата Тоше бил извлечен без знаци на живот и дека многу присутни гости биле пренесени во болницата во Кочани со возила на брзата помош.

На прашање од обвинителството, Моневски изјави дека за акциската контрола немал писмена наредба, туку усна. "Поради лошите искуства наредбата беше дадена усно, како што е дозволено според закон да биде или усно или писмено", рече тој.

Во судницата сведочеа и повеќе посетители на дискотеката. Еден сведок, кој пристигнал околу еден час пред избувнувањето на пожарот, описуваше обиди за спасување и хаосот што настана додека луѓето се обидуваа да излезат. Друг сведок изјави дека видел како еден од обвинетите полицајци помагал, додека дел од обвинетите биле надвор од објектот. Гостинка која влегла околу два часот по полноќ сведочеше: "На влегување си купивме карта, влеговме и секогаш кога излегувавме таму стоевме на десниот шанк, поблиската страна до излезот." Таа додаде: "Кога го забележавме пожарот на почеток не изгледаше дека ќе биде сериозна ситуација, никому не му изгледаше сериозно, немаше паника на почеток." Според нејзиниот исказ, состојбата се променила откако било кажано дека има пожар: "Кога Панчо кажа дека има пожар почна да се создава гужва, луѓето почнаа да излегуваат панично. Јас се упатив кон излезот, пред мене го искршија ѕидот од гипс-картон за да се прошири просторот за излегување затоа што настана многу гужва." Таа опиша и дека било искршено стакло на излезната врата и дека во метежот паднала и се заглавила пред вратата: "Се сеќавам дека се обидуваше да ме извлече лице во униформа."

Судот денеска го одби предлогот да се испита сведокот Лазар Захариев бидејќи тој е обвинет во врска со истиот настан. Како што рече судијката Фанка Јанчулева Михаиловска: "Својството на сведок и својството на обвинет се неспојливи поради што нема да биде сослушан сведокот Лазар Захариев." Судењето се однесува на трагичниот пожар што избувна на 16 март 2025 година во дискотеката „Пулс“ во Кочани, при што животот го загубија 63 лица, а повеќе други беа повредени; обвинението се однесува на 13 полициски службеници за непостапување согласно обврските и акцискиот план за објектот.

Фото: прес-материјал од настанот