Свештеник од Хрватска предупреди: Доста разговори за ајвар и фудбал на погреби

Хрватскиот свештеник Стјепан Иван Хорват јавно повика на повеќе воздржаност при погребните церемонии, откако, како што вели, сè почесто бил сведок на несоодветни разговори додека семејствата се простуваат.

Потсетување на достоинството и тишината

Во објава на социјалните мрежи Хорват опиша сцени од централните моменти на последното испраќање, кога покрај ковчегот плаче семејството, а присутните наместо да покажат почит, разговараат за секојдневни теми.

Свештеникот наведува дека слуша разговори за тоа како се прави ајвар, за двојниците на Путин, за формата на Ливаја, за цените во Бол на Брач и дури за „промената на форматот на најновата апликација на „Конзум“", кои, како што вели, не припаѓаат во таков миг.

Во објавата тој порача: "Ех, народе мој… Погребот е сериозен и достоинствен настан. Тоа е момент кога се простуваме од некого кој ни бил драг, кого сме го сакале, со кого сме поминувале време, кој на некој начин бил дел од нашиот живот и сега засекогаш се разделуваме од таа личност. Сè почесто сум сведок на ситуации кога семејството плаче покрај ковчегот, а луѓето наоколу разговараат за тоа како се прави ајвар, за двојниците на Путин, за формата на Ливаја, за цените во Бол на Брач, за промената на форматот на најновата апликација на „Конзум"… Ајде, луѓе. Додека вие разговарате за тоа дали во ајварот се ставаат два или три проценти сол, некој покрај вас засекогаш се простува од својот татко. Додека се расправате за политика, некој ја оплакува својата мајка. Додека разговарате за Ливаја, некој се простува од сопругата или од своето дете. Затоа, да бидеме луѓе. Да дојдеме, да се помолиме, да ја почитуваме тишината и да покажеме почит. За разговори и расправии има време подоцна – за погреб треба да се има срце. Да внимаваме едни на други", порача свештеникот Стјепан Иван Хорват.

Неговите зборови предизвикаа реакции на социјалните мрежи: дел од корисниците го поддржаа апелот и споделија лични искуства, додека други посочија дека несоодветното однесување понекогаш е резултат на незнаење како да се постапи во тешки моменти.

Фото: прес-материјал од настанот