Свети Мојсеј Црниот: од разбојник до филм

Православната црква и верниците денеска го одбележуваат споменот на Светиот преподобен Мојсеј Мурин — човек чија животна приказна се користи како поука за покајание, смирение и силата на искрената молитва.

Мојсеј потекнувал од Етиопија и првично бил роб. Поради лоша нарав и извршено убиство, неговиот господар го избркал, по што тој се приклучил на разбојничка дружина. Благодарение на големата физичка сила и безобѕирност, брзо станал нивен водач и сеел страв.

Со текот на времето совеста почнала да го гложди. Го оставил разбојништвото и заминал во манастир, каде што им се предал на духовните отци Макариј, Арсениј и Исидор. Се соочувал со тешки искушенија; за да ги совлада лошите мисли, ноќно бдел и носел вода од далечен бунар за старите монаси. По шест години тежок подвиг го пронашол својот духовен мир, бил ракоположен за свештеник, основал манастир и собрал 75 ученици.

Кога дознал дека варварите ќе го нападнат манастирот, им рекол на сите да бегаат, но останал со шестмина браќа и ги изговорил познатите зборови: „Јас мора да загинам од насилство, бидејќи и самиот некогаш правев насилство. Кој се фаќа за меч, од меч и ќе загине.“ (Мт. 26, 52). Варварите ги убиле сите седуммина, а еден скриен ученик видел како од небото се спуштаат седум светли венци врз нивните глави.

Филмска инспирација

Неверојатната животна приказна на Свети Мојсеј послужи како основа за филмската продукција „Свети Мојсеј Црниот“, во режија на Јелена Поповиќ. Филмот повлекува директна паралела помеѓу древната нарација и современиот живот во Чикаго преку ликот на Малик, со цел да покаже дека покајанието и внатрешната преобразба се возможни дури и кога сè изгледа изгубено.

Во продукцијата учествуваат и имиња со меѓународна репутација: како еден од извршните продуценти се јавува Curtis Jackson (50 Cent), а во креирањето на музиката и продукцијата вложиле Wiz Khalifa и Quavo. Главните улоги ги толкуваат актерите Omar Epps и Chuku Modu.

Во народните обичаи денешниот празник носи јасна порака: признајте ги сопствените грешки, најдете место за прошка и запомнете дека никогаш не е доцна за искрено покајание.

Фото: прес-материјал од настанот