OBSH: Katërfishim i obezitetit te fëmijët dhe adoleshentët nga 1990 në 2024

Organizata Botërore e Shëndetësisë njofton se numri i fëmijëve dhe adoleshentëve me obezitet është katërfishuar që nga viti 1990, dhe në 2024 arrin në 170 milionë.

Sipas OBSH-së, prevalenca te personat 5–19 vjeç u rrit nga 2 përqind në 1990 në 8 përqind në 2024. Nga totali, 70 milionë janë fëmijë 5–9 vjeç, ndërsa 100 milionë janë adoleshentë 10–19 vjeç.

Organizata publikoi udhëzimet e saj të para për trajtimin e obezitetit te të rinjtë, duke rekomanduar programe të strukturuara që përqendrohen te ushqimi i shëndetshëm, aktiviteti fizik dhe ndryshimet e qëndrueshme të stilit të jetesës.

Udhëzime për trajtimin dhe kufizimet për ndërhyrjet mjekësore

Udhëzimet saktësojnë se medikamentet për humbje peshe dhe kirurgjia bariatrike nuk duhet të përdoren tek fëmijët nën nëntë vjeç. Për adoleshentët 10–19 vjeç, medikamentet e miratuara mund të merren në konsideratë vetëm nëse programet e përshkruara për ndryshim të stilit të jetesës nuk japin rezultat. Kirurgjia bariatrike lejohet vetëm në rastet e obezitetit të rëndë dhe nën kushte të rrepta.

OBSH paralajmëron se obeziteti në moshë të hershme rrit rrezikun për zhvillimin e diabetit tip 2 dhe problemeve kardiovaskulare. Organizata thekson edhe pasojat për shëndetin mendor — përfshirë stigmatizimin, dhunën nga bashkëmoshatarët, ankthin, depresionin dhe vetëvlerësimin e ulët — dhe rekomandon që shëndeti fizik dhe mendor të adresohen në mënyrë të integruar.

Luz Maria De Regil, drejtoreshë e Departamentit për Ushqim dhe Sigurinë e Ushqimit në OBSH, tha: "Baza e trajtimit të obezitetit te fëmijët dhe adoleshentët nuk janë barnat ose kirurgjia, por qasja në një mbështetje gjithëpërfshirëse që mundëson ushqim të shëndetshëm, aktivitet fizik dhe një ndryshim të qëndrueshëm të sjelljes." Ajo shtoi se prioritet duhet t'i jepet sigurimit të aksesit në kujdes cilësor shëndetësor dhe një mjedis mbështetës që nga fëmijëria e hershme, për t'i ndihmuar fëmijët të arrijnë dhe të ruajnë peshë të shëndetshme.

OBSH thekson se vetëm trajtimi klinik nuk mjafton për parandalimin e përhapjes së obezitetit dhe fton për politika që e bëjnë ushqimin e shëndetshëm dhe aktivitetin fizik më të aksesueshëm dhe të përballueshëm për të gjitha familjet.

Foto: material shtypi nga ngjarja