Талогот и другите омилени епитети: експерти за реториката на премиерот

„Талог“, „мекотели“, „мочуриште“, „медиокритети“, „лешинари“, „некрофили“ — ова се само дел од епитетите кои премиерот Христијан Мицкоски и други функционери од ВМРО‑ДПМНЕ ги употребуваат за политичките противници, присутни секојдневно во изјавите, на прес‑конференции и при говори по разни прилики.

Комуниколозите повикуваат на повисока мерка

На државната прослава во Пелинце, по повод Илинден, Мицкоски употреби силни квалификации и опозицијата ја нарече „талог на општеството“. Во говорот на 2 Август тој ги предупреди граѓаните да не паѓаат во „замката на талогот кој тие го создаваат“ и повика на враќање на довербата во институциите.

– Драги пријатели, ве молам не паѓајте во замката на талогот кој тие го создаваат. Ве молам внимавајте и не му верувајте на тој талог од неуспеси, цинизам и мразење на сè што е успешно. Нашата генерација има обврска да се избори за нешто што е подеднакво важно да ја зачува душата, да ја врати вербата во институциите, да го врати достоинството на чесниот човек и повторно да ја направи надежта најсилна движечка сила на нашето општество – рече Мицкоски.

Комуникологот Сеад Џигал оценува дека навредливата, воинствена и поларизирачка реторика е подолгогодишна појава во политичката култура и дека таквото исмејување и навредување не им прилега на јавни функционери. Тој вели дека ваквиот речник треба да се исфрли бидејќи не одговара на здрава, функционална демократија.

– Особено власта и носителите на државните институции треба да покажат едно повисоко ниво и да се свесни дека кога се обраќаат, не се обраќаат само кон своето партиско членство, туку и кон граѓаните. Тие ги водат институциите. Во крајна линија, да бидеме искрени, тие платите ги земаат од сите граѓани, не само од своите партиски членови и треба да водат сметка. Да имаат едно повисоко ниво на комуникација, кое потоа, условно да речеме, би го следела и опозицијата. Во таа смисла ни недостига тој еден исчекор од партиска реторика кон државнички дискурс во политичката комуникација – вели Џигал.

Во соопштенија и на социјалните мрежи, ВМРО‑ДПМНЕ ја повторува критиката кон опозицијата и ја обвинува за корупција, клиентелизам и погубни политики. „Политичкиот талог, создаден со години корупција, криминал, клиентелизам и погубни политики, денес е најгласен и се обидува да се претстави како морален авторитет. Граѓаните добро паметат кој ја задолжуваше државата, кој ја понижуваше и кој ја доведе до најниско ниво на доверба. Затоа СДСМ е на маргините на политичкиот спектар. Истите тие предавници што тајно преговараа и носеа одлуки на штета на Македонија, денес држат лекции за патриотизам и за транспарентност. Граѓаните добро знаат кој ветуваше европска иднина, а остави разочарување, поделби и лаги,“ пишува во партиското соопштение.

Пратеници од владејачката партија на социјалните мрежи продолжија со лични квалификации: Миле Лефков напиша дека претседателот на СДСМ Венко Филипче и „лојалистите“ се препознале во означувањето „талог на општеството“ и продолжиле со „сеење омраза и поделби“, додека Бране Петрушевски објави дека „Општествениот талог, во кој дел од опозициските структури самите се препознаа, се храни со хистерија, страв и безнадежност".

Критичарите укажуваат дека навредите се пренесуваат и врз правосудството — предметите се прикриваат со алузии за дијареја, температура и грчеви во стомакот — а меѓу пратениците се случуваат и директни лични навреди: една пратеничка од ВМРО‑ДПМНЕ ѝ рече на колешка од СДСМ дека „скока како кокошка“.

Набљудувачите сметаат дека константната употреба на вакви епитети ја поткопува јавната дебата и довербата и повикуваат на воздржана, државничка реторика која би помогнала да се намали поларизацијата и да се врати кредибилитетот на институциите.

Фото: Фејсбук