Терористички напад во Белград: малолетник нападна жандармерец пред израелската амбасада, напаѓачот е убиен

Во Белград, 15 минути по полноќ, беше извршен терористички напад врз припадник на жандармеријата кој ја обезбедувал израелската амбасада, соопшти вицепремиерот и министер за внатрешни работи во технички мандат Ивица Дачиќ.

Според Дачиќ, напаѓачот е малолетник, за кој се сомнева дека е од Шабац, и тој извикал 'Алаху Акбар' и нападнал припадник на жандармеријата со два ножа. Припадникот на жандармеријата го убил напаѓачот во самоодбрана, но при тој инцидент бил полесно повреден — добил посекотина на лицето.

Се води истрага, нивото на закана е подигнато

„Истрагата е во тек и сите детали ќе бидат познати веќе во текот на ноќта. Имајќи предвид дека терористичкиот напад се случи на наша територија, како министер за внатрешни работи кој е одговорен за него, го подигнав нивото на закана од тероризам на највисоко можно ниво, односно на црвено ниво“, изјави Дачиќ и најави зголемена контрола и присуство на полициски сили на локации со посебно безбедносно значење.

„Иако идентитетот на напаѓачот сè уште не е утврден, нашата служба го следеше и се знае дека тој бил поддржувач на Исламска држава. На својот Инстаграм профил, тој држеше црно знаме и симболот на Исламска држава“, додаде тој.

Дачиќ и директорот на полицијата, генерал Драган Васиљевиќ, го посетија повредениот припадник на жандармеријата. Министерот рече дека тој се чувствува добро и дека во текот на денот ќе биде пуштен дома.

Фото: прес-материјал од настанот