Торнадо и силен ветер ги разурнаа делови од Германија, една жена загина

Силно невреме вчера зафати делови од Германија, при што на неколку места беше пријавена голема материјална штета и прекини во снабдувањето со струја. Во градот Фирстенвалде, во покраината Бранденбург, експертите потврдија дека се работи за торнадо.

Германската метеоролошка служба (ДВД) соопшти: "Настанот во Фирстенвалде несомнено беше торнадо". По силниот ветер, пожарникарите и полицијата интервенирале до доцна во ноќта на повеќе локации за да ги отстранат паднатите дрвја и да обезбедат оштетените објекти.

Една жртва и тешко повредена во Рајнска Област-Пфалц

Во градот Валдорф, според полицијата, паднато дрво го погоди засолништето под кое биле двете жени. 58-годишната жена починала на местото на настанот, додека 47-годишната била пренесена во болница со тешки повреди. Потпoар на полицијата изјави дека двете жени, наводно, се движеле заедно кога им пристигнало невремето и побарале засолниште под наткриен дел со клупи.

Невремето предизвикало штети и во други делови на земјата: во градот Хер-Гренцхаузен, во областа Вестервалд, се урнале делови од ѕидови на објекти, а во општината Банбершајд ветровите однеле делови од фасадата на спортската сала „Аубахале“. Регистрирани биле и големи прекини во снабдувањето со електрична енергија.

Окружната управа соопшти дека службите интервенирале на повеќе од 100 места; на автопатот A61 силните налети на ветерот превртеле камион. Во покраината Хесен, областа Лан-Дил пријави оштетување на околу 60 куќи, од откорнати ќерамиди до целосно уништени покриви, при што некои делови од покривите биле однесени и до 100 метри од објектите.

Торнадата се ретки во Германија, но во последните години се појавуваат почесто; "Минатата година во Германија беа потврдени 46 торнада." За да го појасни поимот, Германската метеоролошка служба дава дефиниција: "столб од воздух што е во контакт со тлото, се врти околу повеќе или помалку вертикална оска и се наоѓа под кумулиформен облак". Снимки и фотографии од местата на настанот се шират по социјалните мрежи додека екипите продолжуваат со санирање и истрага.

Фото: Монтажа / Икс