Трагедија на Олимп: 32-годишник го загуби животот по скок во природен базен
Маж загина во кањонот Орлиас по наводен срцев застој откако скокнал во многу студена вода во локалитетот „Црвена Карпа“.
Трагичен настан се случи во кањонот Орлиас на планината Олимп: 32-годишен маж го загуби животот по скок во природен базен, при што, според првичните информации, доживеал срцев застој и се удавил.
Спасувачите пеш го достигнале местото и по околу два часа го извлекле телото
Тројцата пријатели в неделата се упатиле кон локалитетот „Црвена Карпа“, на околу 650 метри надморска височина во кањонот Орлиас — познато место за љубителите на природа и планинарење. По пристигнувањето, 32-годишникот решил да скокне во природниот базен.
Веднаш по влегувањето во исклучително студената вода му се слошило. Од досегашните информации произлегува дека наглата промена на температурата најверојатно предизвикала срцев застој, по што мажот потонал и се удавил. Пријателите веднаш повикале помош на бројот 112.
На терен биле испратени 14 пожарникари и спасувачи. Поради непристапниот и стрмен терен тимовите морале да продолжат пеш, и по околу два часа напорна интервенција успеале да го извлечат мажот од кањонот. Тој бил итно пренесен во Општата болница во Катерини, каде што лекарските екипи се обиделе да му помогнат, но само ја констатирале смртта.
Грчките власти започнаа истрага за да ги утврдат сите околности на несреќата. Иако првичните информации укажуваат дека наглиот контакт со многу студената вода најверојатно предизвикал срцев застој, конечната причина за смртта ќе биде утврдена по извршената обдукција. Надлежните потсетуваат дека и во летните месеци природните базени во планинските кањони можат да имаат многу ниска температура, што може да предизвика сериозен шок при нагло влегување или скок.
Фото: прес-материјал од настанот