Трамп и шефовите на технолошките компании потпишаа договор за контрола на вештачката интелигенција

Американскиот претседател Доналд Трамп соопшти дека на средба во Белата куќа со раководители на најголемите американски технолошки и компании за вештачка интелигенција потпишал морално обврзувачки договор со цел да се намалат ризиците од напредните ВИ-системи.

Трамп ја опиша спогодбата со големи зборови и рече дека неговата администрација разгледува формирање тело за надзор кое ќе ја следи нејзината примена. „Документот на некој начин е како Устав. Го потпишаа најголемите луѓе во светот, го потпишав и јас како претседател, и тоа навистина претставува еден вид заштита. Размислуваме за формирање комисија која би имало околу десет членови кои ќе ја надгледува целата работа“, изјави Трамп по средбата.

Кои ги потпишаа и што предвидува договорот

Договорот го потпишаа извршните директори на Anthropic, Google и Meta, претседателот на OpenAI, извршниот директор на Nvidia и Илон Маск — извршен директор на Tesla, SpaceX, X и xAI. Како што беше објаснето, компаниите се обврзуваат да воспостават внатрешни механизми за следење на способностите и потенцијалните ризици на своите ВИ-модели, со посебен акцент на кибербезбедноста.

Спогодбата предвидува компании да преземат мерки за да спречат нивните системи базирани на вештачка интелигенција самостојно да извршуваат неовластени кибернапади. Исто така, предвидено е формирање специјализирани тимови кои ќе проверуваат дали безбедносните мерки функционираат, а независни надворешни проверувачи ќе извршуваат дополнителни ревизии.

Трамп ја нарече спогодбата чекор на саморегулација од страна на индустриските лидери и не исклучи тоа да биде дополнето со формална комисија ако администрацијата одлучи да воспостави законски надзор. На брифингот не беа соопштени конкретни детали за начинот на спроведување, рокови или кои независни проверувачи ќе бидат ангажирани.

Фото: EPA/Tierney L. Cross