Trump në Dublin: Dëshiron të shohë një Irlandë të bashkuar

Presidenti i Shteteve të Bashkuara, Donald Trump, gjatë vizitës së tij në Dublin deklaroi se do të dëshironte të shihte një Irlandë të bashkuar dhe shprehu bindjen se bashkimi do të ndodhë në një moment të caktuar. Ai i bëri këto komente pas takimit me kryeministrin Micheál Martin.

"Nuk dua të krijoj probleme, por do t'ju them që do të doja ta shihja të bashkuar. Kam miq në të dyja anët, njerëz të mrekullueshëm. Mendoj se do të ishte një sukses i madh për të gjithë nëse do të ndodhte. Në fund të fundit, gjithsesi do të ndodhë," tha Trump në Dublin.

Për mundësinë që bashkimi të ndodhë tani, ai shtoi: "Po flasim për këtë, dhe këtu e keni personin e duhur që mund ta niste atë. Sigurisht, Mbretëria e Bashkuar do të ketë çfarë të thotë për këtë. Por mendoj se do të ishte diçka e shkëlqyer. Si mund të ishte kjo e keqe?"

Para vizitës, Micheál Martin tha se do të diskutojë me presidentin e SHBA-së për një sërë çështjesh me interes të përbashkët dhe do të riafirmojë lidhjet e forta ekonomike dhe kulturore midis Irlandës dhe Shteteve të Bashkuara, si dhe lidhjet mes njerëzve.

Gjatë qëndrimit të tij në Irlandë, Trump pritet të takohet edhe me zyrtarë të tjerë irlandezë dhe me ambasadorin amerikan në Irlandë, dhe do të marrë pjesë në turneun "Irish Open" në fushën e tij të golfit në Doonbeg.

Republika e Irlandës është shtet i pavarur dhe anëtar i Bashkimit Evropian, ndërsa Irlanda e Veriut mbetet pjesë e Mbretërisë së Bashkuar.

Foto: material shtypi nga ngjarja