Три пожари активни утрово; 29 пожари на отворен простор во изминатото деноноќие

Центарот за управување со кризи (ЦУК) соопшти дека во текот на изминатото деноноќие, до 07:30 часот, на територијата на државата се регистрирани вкупно 29 пожари на отворен простор: три се активни, еден е ставен под контрола, а 25 се изгаснати.

Каде се активни огништата

Активен е пожарот на подрачјето на општините Студеничани и Зелениково, на потегот од селата Моране, Вртекица и Рамни Габер кон Палиград, како и над селото Вражале, каде е зафатена мешана шума. Активен пожар има и во гостиварското село Трново, каде гори мешана шума, како и над селото Нежилово во Општина Чашка, каде се зафатени смреки.

Под контрола е ставен пожарот кај кичевското село Тајмиште, на месноста Дарда, каде горела високостеблеста букова шума.

Во текот на изминатото деноноќие изгаснати се 25 пожари на различни локации низ државата, меѓу кои Струмица, Василево, Делчево, Куманово, Јегуновце, Гостивар, Врапчиште, Демир Хисар, Пробиштип, Илинден, Сарај, Чаир, Студеничани, Арачиново, Македонски Брод, Новаци, Петровец, Берово, Карбинци и Чешиново-Облешево.

ЦУК информира дека при овие пожари гореле ниска вегетација, стрништа, сува трева и грмушки, како и повеќе шумски површини; во одделни случаи биле зафатени и ѓубре, слама, објекти и гнездо од штрк.

Во објавено видео се гледаат огнови кои целосно го проголтале патот Штип–Кочани, поради што надлежните апелираа возачите да го избегнуваат тој правец додека трае интервенцијата. Кризните тимови продолжуваат со следење на ситуацијата и координација на локалните екипи.

Фото: илустрација / архива