Тројца македонски државјани загинаа во сообраќајна несреќа на автопат во Словенија

Тројца македонски државјани загинаа, а уште двајца се повредени во тешка сообраќајна несреќа во Словенија што се случила попладнево околу 16:30 часот. Несреќата се случила на делницата меѓу Унец и Равбаркоманда во правец кон Копер.

Според првичните информации од Полициската управа Копер, во несреќата учествувале товарно и патничко возило. Камионот бил запрен покрај автопатот поради дефект, кога автомобилот удрил во задниот лев дел од приколката.

Во автомобилот имало пет лица, сите државјани на Северна Македонија. Лекар на местото на несреќата констатирал смрт кај три лица. Еден од повредените со хеликоптер бил пренесен во болница, додека повредениот возач на автомобилот бил транспортиран со возило на Итната медицинска помош.

Увид и истрага

Увидот на местото на несреќата сè уште трае. На лице место се упатени државен обвинител и истражен судија кои го следат почетниот истражен процес.

Повеќе информации за причините за несреќата ќе бидат дадени по завршувањето на првичните истражни дејствија.

Фото: прес-материјал од настанот