Угинаа најмалку 15 тони пастрмка во Треска кај Кичево
Концесионерот Hunter Fish проценува дека на потег од околу 15 km угинале најмалку 15 тони пастрмка; граѓаните се предупредени да не ја конзумираат.
На потег од околу 15 километри во реката Треска кај Кичево денеска е пријавен голем помор на автохтоната пастрмка Salmo macedonicus — според проценката на концесионерот, во настанот угинале најмалку 15 тони риба.
Концесионерот Hunter Fish наведува дека смртта на рибата е регистрирана на потегот од игралиштето во Влазними и пречистителната станица во Кичево до селото Лисичани. Најголемиот дел од пронајдените примероци тежеле меѓу еден и два килограма, а има и риби од три до четири килограми и поединечни примероци потешки од четири килограми. На некои вирови биле видливи и по околу 50 угинати единки.
Од Hunter Fish упатуваат апел до граѓаните да не ја собираат и да не ја консумираат угинатата риба, бидејќи не е безбедна за употреба.
Можни причини
Како можни причини за поморот од компанијата се наведуваат исклучително нискиот водостој на Треска и нефункционирањето на пречистителната станица во Кичево. Концесионерот дополнително укажува на последиците од градежните работи на новиот автопат, за кои тврдат дека се оштетени повеќе извори и водотеци во подрачјето.
Во прилог на ова се посочуваат и други фекални испусти во кичевското сливно подрачје — од притоките и од самата Треска — кои може да го влошиле загадувањето.
Точната причина за поморот и степенот на загадување треба да ги утврдат надлежните институции преку теренска проверка и лабораториски анализи на водата и на угинатата риба. Изјавата од концесионерот ја даде Бесар Елези.
Фото: финиш на изборите во Шведска – опозицијата…
