УЈП почнува кампања за пријавување приходи од краткорочно сместување

Управата за јавни приходи (УЈП) ја стартува кампањата „Фер туризам започнува со пријавен доход“ со цел да го поттикне пријавувањето и плаќањето на данокот од физички лица кои нудат краткорочно сместување преку платформи како "Букинг", "Ербиенби" или "Трип адвајзор", но и на друг начин. Активностите се насочени кон едукација и намалување на сивата економија во туристичкиот сектор.

Рокови и постапка за пријавување

Од УЈП потсетуваат дека рокот за пријавување на приходите е најдоцна до 10-ти во месецот за приходите остварени во претходниот месец, а данокот треба да се уплати до 15-ти. На пример, доколку апартманот е издаден на крајот на јуни, а закуподавачот ги добил парите во јули, пријавата се поднесува најдоцна до 10 август.

Пријавите се задолжително електронски и УЈП објави детални упатства кои го воде корисникот низ постапката, а даночните службеници стојат на располагање за помош. За пријава е потребна активна имејл адреса и регистрација во системот е-персонален данок; доколку граѓаните веќе имаат креирано профил за скенирање „МојДДВ“, истиот профил може да се користи и за оваа намена.

„Не е цел да Управата да ги казни сите, немаме ние никаква корист од тоа ако сите обврзници ги казниме затоа што не пријавиле нешто. Не ни е целта ни да ги уловиме да бидат казнети сите тие што не пријавуваат. Главната цел на УЈП е подигнување на свеста на граѓаните за почитување на принципот на самооданочување. Значи, целта е секој граѓанин да има лична свест и општествена одговорност сопствената обврска која што законот ја предвидува да ја испочитува. Последиците се нешто што е дополнително и тоа не би сакал ни да го коментирам. Секако дека постојат, но добро е воопшто да не стигнеме до таа ситуација“, вели Ѓорѓи Михаилов, даночен службеник во УЈП.

Данокот на личен доход изнесува 10% од бруто приходот, а законот предвидува признаени трошоци кои можат да ја намалат даночната основа до дури 15%. Казните за непочитување може да достигнат до 250 евра, а во поединечни случаи може да следи и кривична пријава за затајување данок.

Лани вкупната заработка од приватно сместување за краток престој надмина 13 милиони евра, а УЈП наплатила повеќе од милион евра данок. Кампањата, велат од УЈП, има за цел да информира и дека приходите обезбедени преку странски платформи не се ослободени од пријавување и плаќање данок.

Фото: прес-материјал од настанот