Управниот суд го потврди казнувањето на „Рамстор Македонија“ — 20.000 евра
Судот ја одби тужбата на компанијата и потврди дека договорите за размена на податоци со добавувачи содржеле непријавени надоместоци.
Управниот суд ја потврди одлуката на Комисијата за заштита на конкуренцијата со која компанијата „Рамстор Македонија“ ДОО Скопје е казнета со 20.000 евра за прекршување на Законот за забрана на нефер трговски практики во синџирот на снабдување со земјоделски и прехранбени производи.
Судот ја одби како неоснована тужбата поднесена од компанијата и одговорното лице, со што останува во сила претходно изречената санкција.
Што утврди судот
Во образложението е наведено дека компанијата склучила посебни договори за размена и купопродажба на податоци со добавувачите „Пивара" АД Скопје и „ВВ Тиквеш" АД Кавадарци. Тие странични договори предвидувале дополнителни надоместоци кои не биле вклучени во основните договори за снабдување, што судот го оцени како нефер трговска практика.
Со пресудата е потврдена и правилната примена на законските одредби кои забрануваат неповрзани плаќања и надоместоци за истражување на пазарот ако тие не се јасно утврдени во договорите за снабдување.
За утврдениот прекршок „Рамстор Македонија“ доби глоба од 20.000 евра, додека одговорното лице е казнето со 350 евра во денарска противвредност.
Фото: прес-материјал од настанот
