Урсула фон дер Лајен во петок во Скопје — Брисел предупредува: блокадата може да ја сврти Македонија кон Русија или Кина

Претседателката на Европската комисија, Урсула фон дер Лајен, в петок ќе престојува во Скопје, додека во Брисел се подготвува нацрт‑план за постепена интеграција на земјите кандидати и се зголемува загриженоста дека одолговлекувањето на преговорите може да ја приближи Северна Македонија кон Русија или Кина.

Брисел следната недела ќе ги понуди патоказите

Во нацрт‑предлогот, кој Брисел планира да им го предложи на земјите‑кандидатки следната недела, стои дека документот, креиран од експертот Александар Адам — кој важи за творец на францускиот предлог — предвидува постепена интеграција во единствениот пазар, вклучително полесна трговија и пристап до истражувачки програми додека трае процесот на пристапување.

Во предлогот се предвидени посебни, забрзани патокази за Украина, Молдавија, Албанија и Црна Гора во наредните години, додека за другите земји кандидати процесот би се одвивал побавно.

„За Северна Македонија, Косово, Босна и Херцеговина, Србија и Турција, процесот продолжува да се одолговлекува, што ги зголемува стравувањата од нивно оддалечување од ЕУ и приближување кон Русија или Кина”.

Фон дер Лајен ја почнува турнејата по Западен Балкан од Тирана и во петок ќе престојува во Скопје. Овојпат нема да ги посети Србија и Босна поради претстојните парламентарни избори; на средбите се очекува да се разговара за најавените нови патокази.

Пред средбата, премиерот Христијан Мицкоски изјави дека ставовите на Владата за евроинтеграцискиот процес се добро познати. Од опозициската СДСМ ја обвинуваат Владата дека ги одолговлекува уставните измени и предупредуваат дека „Арамијата Мицкоски веќе ја подготви листата со изговори: референдум во Исланд, војни, избори во покраини каде победуваат екстремни структури, Ле Пен во Франција, светот се менува, другото не е на нас”.

Фото: прес-материјал од настанот