Уште една тешка ноќ во Газа: обилен дожд ги поплави шаторите

Раселените семејства во Појасот Газа прекажаа тешка ноќ откако обилните врнежи ги поплавија импровизираните шатори и засолништа, натопувајќи душеците и личните работи, додека патеките меѓу шаторите се претворија во калливи бари.

За стотиците илјади Палестинци раселени поради војната и сместени во слабо заштитени шатори, дождот означува почеток на уште една тешка зима во услови на голема ранливост кон временските непогоди.

Извици од кампот

Таер Абу Хамад, раселен од Беит Лахија во северниот дел на Газа, рече дека семејството веќе од три часот наутро се обидува да ја исфрли насобраната вода: „Целиот шатор е полн со вода. Живееме во навистина трагични услови, никој не се грижи за нас. Ни треба решение, некој да покаже милост кон нас“.

Ахмед Дарвиш, раселен од градот Газа, опиша како шаторот му се урнал врз него додека невремето беснеше: „Ситуацијата е катастрофална. Ноќеска имаше обилни врнежи од дожд и сè ни е поплавено. Целиот шатор е под вода, земјата е потопена, а шаторот се урна врз мене. Ова е вистинска катастрофа, ќебињата и душеците ни се целосно натопени. Условите се ужасни.“

Маџед Ал-Омари, кој останал без еден екстремитет и користи патерици, рече дека ќе им биде тешко да најдат засолниште: „Вечерва ќе мора да спиеме на улица или да најдеме друго место за престој, бидејќи, како што гледате, веќе немаме каде да се засолниме. Шаторот е целосно уништен, дрвената конструкција и најлонската покривка се искршени.“

Канцеларијата на ОН за координација на хуманитарни прашања во октомврискиот извештај наведе дека околу 950.000 раселени Палестинци живеат во локации со среден до висок ризик од поплави, а повеќе од 400.000 се во подрачја со висок ризик, што го потенцира нивното изложување на опасност од екстремни временски настани.

Фото: прес-материјал од настанот