Утре е денот на Преподобна Касијана — заштитничка на уметниците и потценетите жени

Утре, на 20 септември, православниот календар го одбележува споменот на Преподобна Касијана Песнописателка од Цариград — жена што во своето време ги споила високото образование, поетскиот дар и духовната стаменила.

Од царски кандидат до игуменија

Родена во Цариград помеѓу 805 и 810 година, во благородничко семејство, Касијана уште од младост се издвоeла по ретка убавина и образованост. Според преданијата, таа била меѓу кандидатките за невеста на византискиот цар Теофил, кој ја провоцирал со мислата: „од жената потекнале најголемите зла“. Касијана му одговорила достоинствено: „А и најголемите добрини“.

Наместо да остане во царските кругови, таа ја избрала монашката патека. Во 834 година основала манастир (општожитие) западно од Цариград и станала прва игуменија. Нејзиниот живот бил динамичен: патувала низ Италија и Крит, и ја завршила земната патека на грчкиот остров Касос.

Касијана е позната како врвна песнописателка и поетеса — меѓу делата што ги оставила е стихирата за Велика Среда, посветена на грешницата што ги излеала миризливите масла врз нозете на Христос.

Во народната побожност, Преподобна Касијана се смета за заштитничка на уметниците, писателите, поетите и песнописците — сите оние чија творечка сила е зборот и мелодијата. Таа, исто така, се призива за заштита на жените кои се соочуваат со неправди, предрасуди или потценување на нивниот ум и труд.

Верниците ѝ се молат за духовна мудрост, дар за убаво говорење, сила при искушенија и мир во семејството. Традицијата нагласува дека најбрзо ги услишува молитвите кои доаѓаат од искрена и скршена душа, особено кога се бара патоказ во тежок животен избор или олеснување од клевети и неправди.

На нејзиниот ден се советува да се посветиме на читање, пишување и уметничко изразување, да побараме прошка и помирување со оние со кои сме во расправија и да покажеме грижа за послабите — особини што како игуменија Касијана ги негувала во својот живот.

Фото: прес-материјал од настанот