Вардар ги пушти во продажба сезонските билети — продажбата трае до 25.08.2026

Ракометниот клуб Вардар 1961 ги пушти во продажба сезонските билети за новата сезона. Цената изнесува 4.500 денари, а со купувањето на билетот навивачите ќе можат да ги проследат сите натпревари на „црвено‑црните“, вклучително и групната фаза во Лигата на шампионите.

“Почетокот на сезоната наближува. За таа цел, под слоганот „Љубовта наша голема” започнува продажбата на сезонски билети за домашните натпревари кои РК Вардар 1961 ќе ги одигра во домашното првенство и Купот, Регионалната лига и групната фаза од Лигата на Шампионите.

Цената на сезонскиот билет изнесува 4500 денари, а продажбата се врши единствено онлајн, преку продажната мрежа на клубот.

Каде и како ќе важат билетите

При купувањето, навивачите имаат можност самите да изберат свое место во салата од каде ќе го бодрат клубот на домашен терен, во СЦ. „Јане Сандански” и во „Расадник”, за каде исто така ќе важат сезонските билети, без разлика на тоа што седиштата не се нумерирани.

Купените билети во PDF формат подоцна ќе бидат заменети со пластифицирани карти со кои на сопствениците ќе им се овозможи влез на натпреварите. Продажбата ќе трае до 25.08.2026, што значи дека на заинтересираните им остануваат 12 дена да ги обезбедат своите места.

„Купи сезонски билети и бодри го Вардар“, порачаа од Вардар и ги повикаа навивачите да ги полнат трибините, да стојат покрај тимот и во пораз и во победа.

Фото: прес-материјал од настанот