Веб-страниците на Владата и министерствата навремено заштитени по PHP ранливости

Веб-страниците на Владата и на министерствата во Северна Македонија навремено беа заштитени откако беа објавени информации за критични безбедносни ранливости во програмскиот јазик PHP, соопшти Министерството за дигитална трансформација. Министерството наведува дека презело низа превентивни мерки додека стручните тимови го отстранувале ризикот.

Превентивни блокади, проверка и закрпи

Во рамките на превентивните активности, привремено бил блокиран надворешниот веб-сообраќај кон засеганите системи за да се намали можноста за евентуално искористување на ранливостите. Потоа биле проверени софтверските верзии, применети се безбедносни закрпи и ажурирања, и била тестирана функционалноста и безбедноста на веб-серверите пред обновување на услугите.

„Според досегашните проверки, не се утврдени индикации за успешно искористување на наведените ранливости или за компромитирање на веб-страниците на Владата и министерствата“, се вели во соопштението од кабинетот на министерот за дигитална трансформација Стефан Андоновски.

Министерството посочува дека преку Секторот за кибербезбедност и владиниот тим за компјутерска безбедност (МКД-ГОВ-ЦСИРТ) продолжува засилено и континуирано следење на киберзаканите, анализа на безбедносните настани и лог-записите и проверка на потенцијални индикатори за компромитирање.

„Заштитата на владината дигитална инфраструктура останува приоритет на Министерството. Преку навремено откривање и отстранување на ранливостите и примена на соодветни безбедносни ажурирања, Министерството продолжува да ја зајакнува безбедноста на системите и да обезбедува сигурно и стабилно функционирање на електронските услуги за граѓаните и компаниите“, додаваат од ресорното министерство.

Откриените слабости во PHP предизвикаа глобални претпазливи мерки: владини и приватни сајтови во Европа и светот беа привремено исклучувани додека се применуваат закрпите. Компанијата за сајбербезбедност Wiz проценува дека околу 70 проценти од светските веб-страници користат PHP. Американската агенција за национална безбедност (НСА) им препорача на организациите веднаш да ги поправат ранливите системи или да ги отстранат од интернетот.

Фото: Принтскрин