Величковски: Една година од интеграцијата во СЕПА — заштеди од 5 милиони евра, побрзи и поевтини плаќања

Една година откако земјата се приклучи на Единствената област за плаќања во евра (СЕПА), Народната банка оцени дека интеграцијата веќе носи реални ефекти за домаќинствата и компаниите, како и дополнителни придобивки за економијата.

Побрзи трансфери и пониски провизии

Вицегувернерот Игор Величковски го презентираше прелиминарниот биланс: испраќањето 500 евра кон земја членка на СЕПА е во просек шест пати поевтино во однос на моделот на кореспондентно банкарство, а трошоците за примање на таков трансфер се намалени за половина. За бизнисите, испраќањето на 20.000 евра до договорна страна во СЕПА сега чини девет пати помалку, со видливи намалувања и кај примачите.

Плаќањата во евра кои порано бараа од еден до три работни дена за завршување, сега преку СЕПА се обработуваат истиот работен ден или најдоцна до следниот работен ден.

СЕПА каналот бележи постојан пораст и веќе опфаќа речиси 70 отсто од влезните и излезните текови по број, што, според вицегувернерот, доведе до значителни заштеди на банкарските провизии — проценето околу 5 милиони евра во текот на првата година. Тоа претставува директна финансиска корист за домаќинствата и фирмите и отвора простор за инвестиции и локален раст.

Величковски истакна и засилување на ценовната конкуренција меѓу давателите на услуги и постепено зголемување на бројот и разновидноста на учесниците на пазарот. Народната банка го постави како приоритет воведувањето инстант плаќања како следен голем чекор во модернизацијата на националниот платен систем.

Тој додаде дека преминот кон инстант плаќањата и усогласувањето со европските регулаторни стандарди не се само реформа на финансискиот сектор, туку стратешки чекор кој овозможува побрз економски раст и подлабока интеграција на земјата во европските и глобалните текови.

Фото: прес-материјал од настанот