Владината програма за 35 години независност чинела 5,54 милиони евра
81-страничниот извештај презентиран од портпаролката Марија Митева ги ги разгледува трошоците за 18 настани во 13 градови.
Владата објави дека програмата за одбележување на 35-годишнината од независноста чинела вкупно 5,54 милиони евра (340.509.749 денари). Извештајот беше презентиран од портпаролката на Владата Марија Митева и е доставен од компанијата задолжена за реализација на активностите.
Документот има 81 страница и ги содржи концептите на програмата, продукциските и логистички подготовките, списокот на ангажирани уметници и соработници, како и финаниската рамка за 18 настани одржани во 13 градови.
Како се распоредени средствата
Според финансискиот извештај, најголем дел од средствата отишол за хонорари на артисти и изведувачи — 2,1 милион евра (129.307.500 денари). За продукција се прикажани 1,56 милиони евра (96.272.512 денари), за логистика 951 илјада евра (58.527.037 денари), а за хонорари на соработници 871 илјада евра (53.570.250 денари). За маркетинг се издвоени најмалку — 46 илјади евра (2.832.450 денари).
Митева посочи дека основна определба на програмата била македонските уметници да имаат централно место во одбележувањето. Како еден од најобемните сегменти беше наведена музичко-сценската копродукција „Силно светнал ден“, реализирана во соработка со ОХО.
Караванот минал низ 11 градови: Охрид, Битола, Велес, Крушево, Куманово, Штип, Прилеп, Кичево, Кавадарци, Пробиштип и Скопје. На проектот, кој вклучуваше LED-под на сцената, биле ангажирани 41 македонски вокален изведувач, 20 танчери и актери и оркестар од 15 музичари.
Фото: СДК.МК)
