Власта останува на изградбата на дата-центри; Мицкоски: преговараме со 5 до 6 инвеститори

Владата не отстапува од плановите за изградба на дата-центри во земјава: премиерот Христијан Мицкоски изјави дека во моментов се преговара со "5 до 6" потенцијални инвеститори, меѓу кои има и една голема мултинационална компанија.

Во услови на негодувања во јавноста и критики од опозицијата, Мицкоски ги бранеше владините намери и ги оцени нападите како невистини и политички мотивирани. Тој ги одговори новинарските прашања на настанот во Владата по повод потпишувањето на Договорот за проектирање и изградба на интерконективниот гасовод меѓу Македонија и Србија и отфрли тврдења за тајни договори.

За обвинувањата и транспарентноста

„Во однос на коментарите на опозицијата, претпоставувам дека кај нив работи Фројд и тие мислат дека како што тие се однесуваа кон државата и кон граѓаните, лажејќи ги, ограбувајќи ги, понижувајќи ги, така и сите се однесуваат. Ние како влада немаме намера ништо да правиме под маса. Секоја странска инвестиција или инвестиција која е стратешка ја објавуваме јавно, транспарентно и тука нема никаква дилема да има“, изјави Мицкоски.

Тој ја образложи и економската логика: ако не беа вештачката интелигенција и податочните центри, економиите како американската би изгледале поинаку, рече тој, наведувајќи примери на глобални компании. „Овие проекти се во насока да преку гас се изградат гасни централи кои ќе произведуваат електрична енергија којашто подоцна ќе се користи во овие дата-центри“, додаде премиерот.

Во врска со проектот во Пехчево, кој го отфрли Советот на Општината, Мицкоски рече дека станува збор за приватна иницијатива и даде гаранции дека државата ќе постапи јавно и транспарентно доколку се вклучи: „Тоа е приватна иницијатива и е предлог на нацрт-урбанистички план. Тука државата нема ништо. Кога државата ќе прави или учествува за изградба на таков објект јавно и транспарентно ќе кажеме пред граѓаните.“

Лидерот на опозицискиот СДСМ, Венко Филипче, вчера обвини дека Владата тајно преговара со компанија која, според неговите тврдења, веќе обезбедила 100 мегавати електрична моќ и директен пристап до реката Вардар, и објави документ со таа тврдња, што ја продлабочи политичката дебата околу плановите за дата-центри.

Фото: МИА