Влен ѝ одговори на ДУИ: „Лажете, Коридорот 8 се гради“

Коалицијата Влен ги отфрли обвинувањата на опозициската Демократска унија за интеграција (ДУИ) дека Владата намерно го запоставува Коридорот 8, велат дека тврдењата се пропаганда и инсистираат дека на терен се работи на повеќе делници.

Влен посочува активни градилишта и изминати километри

Реакцијата на Влен следува по денешните изјави на ДУИ дека постои политичка наредба за забрзување на изградбата на делницата Прилеп–Битола (Коридор 10‑Д) пред следните избори, и дека ресурсите се насочени во однос „4 спрема 1“ во корист на тој правец.

Во демантот, коалицијата ги нарекува соопштенијата на ДУИ „пропагандна кујна“ полна со измислици и измислена математика и како конкретен противаргумент ги набројува градежните активности на клучните траси. "На делницата Гостивар – Букојчани работите се одвиваат на 17 од вкупно 31 километар, а активностите продолжуваат и на Тетово – Гостивар, како и на другите делници. Коридорот 8 е стратешки проект и ќе биде реализиран", потенцираат од Влен.

Во соопштението Влен го исмее и тврдењето за наводниот однос „4 спрема 1“, посочувајќи дека таквата „новата математика“ потекнува од партиско предпоставување: „Сега измислиле и нова математика – ’4 спрема 1’. Бројки собрани којзнае во кое партиско кафуле. Опозицијата очигледно тешко се согласува со реалноста, па од очај почнаа да одат од градилиште на градилиште, броејќи багери за да видат каде се работи повеќе", се наведува во соопштението на Влен.

Коалицијата побара од ДУИ, наместо да создава „празна врева“ и без аргументи да го меша НАТО во својата пропаганда, да објави барем еден официјален документ што ќе ги поткрепи тврдењата за соодносот. На крајот, Влен упати и директна критика до партијата на Али Ахмети, обвинувајќи ја дека продолжува да шири невистини како во периодот кога била на власт и предупреди дека ако продолжат со ваквиот пристап, гласачите може целосно да ги избришат од политичката карта.

Фото: прес-материјал од настанот