Сиљановска‑Давкова: И покрај блокадата, посветени сме на ЕУ‑интеграцијата
На средба со амбасадорите од групата „Пријатели на Западен Балкан“ претседателката ги потенцираше реформите и очекува поддршка од Грција и Италија.
Претседателката Гордана Сиљановска‑Давкова денес одржа работна средба во Скопје со амбасадорите на земјите членки на групата „Пријатели на Западен Балкан“, на која главни теми беа регионалната соработка и европската перспектива на земјата.
Фокус на реформи, усогласување и претстојни претседателства
На средбата претседателката им упати благодарност на амбасадорите — Ирена Андраси (Хрватска), Јоанис Враилас (Грција), Балинт Одор (Унгарија), Винченцо Челесте (Италија), Јурај Ноциар (Словачка) и Владимир Бертл (Чешка) — за нивната поддршка кон регионалните напори и евроинтеграцијата.
Сиљановска‑Давкова ја истакна постигнатата согласност на домашното законодавство со правото на Европската Унија и потполното усогласување со заедничката надворешна и безбедносна политика на ЕУ како потврда за македонската посветеност кон европскиот пат.
„И покрај блокадата во пристапниот процес, солидното ниво на усогласеност на нашето законодавство со правото на Европската Унија и стопроцентната усогласеност со заедничката надворешна и безбедносна политика на ЕУ ја потврдуваат македонската посветеност на евроинтегративниот процес,“ рече претседателката.
Како дополнителна потврда за напредокот, таа го посочи забрзаното спроведување на Реформската агенда, што, како што подвлече, е наведено и во овогодишниот извештај на Европската комисија.
Сиљановска‑Давкова изрази очекување дека интензивирањето на македонскиот пристапен процес и продлабочувањето на регионалната интеграција ќе бидат приоритет на претстојните претседателства со Советот на Европската Унија, со посебен акцент на претседателствата на Грција и Италија, кои ги нарече пријатели на Западен Балкан.
Фото: Кабинет на претседател на РСМ
