Сали: Постепената интеграција треба да донесе конкретни придобивки уште пред членството во ЕУ

Северна Македонија треба да ги почувствува конкретните придобивки од приближувањето кон Европската Унија уште пред полноправното членство, изјави првиот заменик-претседател на Владата и министер за европски прашања Беким Сали по средбата со пратеникот во германскиот Бундестаг Петер Бајер.

Како што соопшти Министерството за европски прашања (МЕП), разговорот се однесувал на европската перспектива на земјата, тековните промени во политиката на проширување и конкретните можности за продлабочување на соработката меѓу двете земји, при што во фокусот била постепената интеграција во единствениот европски пазар.

Министерот Сали го нагласил значењето на побрз, попредвидлив и заснован на заслуги процес на проширување и посочил дека европската интеграција треба да носи конкретни резултати веднаш. Тој изјавил: "Постепената интеграција е можност европската перспектива да ја претвориме во конкретни резултати додека продолжуваме со реформите неопходни за полноправно членство".

Како конкретен пример беше истакнато вклучувањето на Северна Македонија во Единствената област за плаќања во евра (СЕПА), што доведе до намалување на трошоците за прекугранични трансакции и проценети заштеди од над пет милиони евра. На средбата се зборувало и за напредокот во преговорите за роаминг со ЕУ, за подобрување на регионалната поврзаност и за олеснување на протокот на стоки.

Посебно внимание било посветено на предизвиците со кои се соочуваат превозниците од Северна Македонија во контекст на правилата за престој во шенген-зоната и на потребата од практични решенија за зачувување на синџирите на снабдување и економските врски со пазарите на ЕУ. Разговарано е и за спроведувањето на Реформската агенда во рамки на Планот за раст за Западен Балкан, со акцент на владеењето на правото, реформата на јавната администрација, дигиталната трансформација и економската конкурентност.

Посветеност на реформите и јасни услови

Сали ја потврдил посветеноста на Северна Македонија на реформите и на праведен, кредибилен и објективно заснован процес на пристапување и ја истакнал важноста од дијалогот со Германија и нејзината улога во регионалната соработка и во дебатата за проширување на ЕУ.

Денеска, еврокомесарката за проширување Марта Кос претставувајќи го овогодишниот пакет за проширување пред Комитетот за надворешни работи на Европскиот парламент – АФЕТ, навела три новини: Комисијата ќе објави индикативни патокази за четирите кандидати со најголем напредок, ќе применува модел на постепена интеграција и ќе стави нов фокус на интегрираната природа на европската безбедност. Кос додала: "Условите за Северна Македонија се јасни, треба да ги направи уставните измени за да се придвижи кон ЕУ – сè зависи од земјата".

Фото: прес-материјал од настанот