Влен: Следната година со воз од Скопје до Приштина за 50 минути
Железничките претпријатија на Северна Македонија и Косово работат на директна линија, додека се објавува и изградба на автопатот Скопје–Блаце.
Владејачката партија Влен објави дека железничките претпријатија на Северна Македонија и на Косово работат на воспоставување директна железничка линија помеѓу Скопје и Приштина, која, според партијата, се очекува да биде пуштена во сообраќај следната година.
Време на патување и поврзани патни проекти
Од Влен велат дека новата железничка врска би го скратила времето на патување меѓу Скопје и Приштина на околу 50 минути, што би значело побрзо и поудобно поврзување за граѓаните.
„Од Скопје до Приштина со воз за околу 50 минути. За граѓаните ова би значело побрзо патување и уште една можност за транспорт, без разлика дали одат на работа, на студии или кај своите блиски“, велат од Влен.
Партијата додава дека железничкиот проект се реализира паралелно со изградбата на автопатот Скопје–Блаце, што, како велат од Влен, ќе го олесни патувањето кон Приштина и ќе ја подобри логистиката за транспорт на стоки.
Како коалициски партнери во власта, од Влен нагласуваат дека се обврзани овие проекти да се реализираат што е можно побрзо за да им се овозможи на граѓаните полесно и побрзо патување, а на компаниите поефикасен транспорт на стоки.
Фото: прес-материјал од настанот
