Внатрепартиски судир се засилува – Филипче упати остри пораки

Поделбите во СДСМ излегоа на површина и се интензивираат откако Платформата „Разговори за иднината во 12 и 5“ отвори нов фронт во партијата, а партиското раководство поостро реагира кон нејзините промотори.

Претседателот на СДСМ, Венко Филипче, директно ги критикуваше поранешните соработници и не ги штедеше зборовите за сопартијците кои, според него, се обидуваат да ја сменат раководната гарнитура.

„Јас не сум скаран, но мора да кажам дека сум разочаран поради тоа што вратата им беше отворена и ја имаат отворена, ако навистина имаат добра намера. Зошто не се вклучија во досегашните партиски активности?! Еве пратеничката Петровска не се појавила на ниту една партиска активност во изминатите месеци, ја нема извршено својата партиска должност. И сега ќе зборува за некакви реформи. Првенците на таа платформа се луѓето коишто нанесоа најголема штета на партијата и за малку ќе ја закопаа“.

Платформата најавува план за окрупнување

Иницијаторите на Платформата ги најавија обврските за оваа недела — тие велат дека ќе му го претстават на Филипче планот за консолидација и окрупнување на опозицискиот фронт. Споменуваат и план Б, но неговите детали засега не се познати за јавноста.

Од друга страна, пораките не доаѓаат само од внатре во СДСМ — владејачката ВМРО‑ДПМНЕ, преку својот портпарол Бране Петрушевски, ја повика лидерската структура на СДСМ да ги смири страстите и предупреди дека партијата се движи кон пропаст, ако расколите се продолжат.

„Филипче засега нека размисли како да ги смири страстите во опозицијата, ако воопшто сака да биде човек кој води сериозна партија, бидејќи вака СДС се движи кон пропаст“.

Претходно, Премиерот Мицкоски оцени дека Платформата ја пропуштила можноста да остави позитивен прв впечаток, поради потценување на граѓаните. Филипче, пак, тврди дека членовите на Платформата добиваат пари од власта и дејствуваат во нејзин интерес. Внатрепартискиот спор ги открива растечките тензии во СДСМ во пресрет на идните политички предизвици.

Фото: прес-материјал од настанот